आईसीटी समाचार
नेपालकै पहिलो अनलाइन फुड डेलिभरी कम्पनी फुडमाण्डुमा साइबर आक्रमण गरी डेटा सार्वजनिक गर्ने ह्याकरलाई नेपाल प्रहरीको साइबर ब्यूरोले पक्राउ गरेको छ ।
ब्यूरोले नवलपरासी पश्चिम सुनवल नगरपालिका घरभई हाल काठमाडौंको रानीबारीमा बस्दै आइरहेका १९ वर्षिय दिनेश तिवारीलाई पक्राउ गरेको हो ।
तिवारीले विद्युतीय कारोबार ऐन २०६३ को परिच्छेद ९ बमोजिम कसुर गरेको खुल्न आएकाले जिल्ला अदालत काठमाडौंबाट पक्राउ अनुमति लिई मंगलबार पक्राउ गरी थप अनुसन्धान भइरहेको ब्यूरोका प्रवक्ता नबिन्द अर्यालले बताएका छन् ।
ब्यूरोले ‘ह्याकर हन्ट’ नामक अप्रेसन सञ्चालन गरेको छ । उक्त अप्रेसन अन्तरगत नै तिवारीलाई पक्राउ गरेको हो । यसअघि पनि ह्याकर हन्ट अन्तरगत लोकसेवा आयोगको सर्भर ह्याक गर्ने तीनजना पक्राउ परिसकेका छन् ।
