आईसीटी समाचार
नेपालको आफ्नै स्याटेलाइट राख्न नेपाल दूरसञ्चार प्राधिकरणले पुनः नयाँ प्रक्रिया अगाडी बढाएको छ । स्याटेलाइट राख्न चारवर्ष अघि शुरू गरेको पुरानो प्रक्रिया रद्द गरेपछि प्राधिकरणले नयाँ प्रक्रिया अगाडी बढाएको हो ।
दूरसञ्चार प्राधिकरणले बुधबार सूचना प्रकाशित गर्दैं स्याटेलाइटको नियमन तथा सुरक्षा, व्यवसायिक मोडालिटी र सञ्चालनको मोडालिटी नीति तयार गर्न अन्तर्राष्ट्रिय परामर्श माग गरेको छ ।
परामर्शको लागि नेपाल सरकारले छुट्टै रकम विनियोजन गरेको भन्दै दूरसञ्चार प्राधिकरणले इच्छुक परामर्शदाताबाट आशयपत्र माग गरेको हो ।
यो पनि पढ्नुहोस्ः नेपालको आफ्नै स्याटेलाइट राख्न चारवर्ष अघि शुरु गरेको प्रक्रिया रद्द
इच्छुक परामर्शदाताले आशयपत्रसँग सम्बन्धित डकुमेन्ट निःशूल्क लिन सक्ने प्राधिकरणले जनाएको छ । प्राधिकरणका अनुसार परामर्शदाताले यो प्रक्रियाको लागि अन्य परामर्शदातासँग सहकार्य गर्न सक्नेछन् ।
परामर्शदाताले आगामी डिसेम्बर ३१ भित्र आफ्नो आशयपत्र दर्ता गरिसक्नुपर्नेछ । आशयपत्रको मुल्याङ्कन ४० प्रतिशत योग्यता, ५० प्रतिशत अनुभव र १० प्रतिशत क्षमताका आधारमा गरिने छ ।
आशयपत्र मुल्याङ्कनको आधारमा सर्टलिस्टेड फर्महरुलाई मात्र प्राविधिक र वित्तिय प्रस्ताव पेश गर्न इन्भाइट गरिनेछ । आशयपत्र पास हुनलाई न्युन्तम ६० स्कोर प्राप्त गर्नुपर्ने छ ।
