आईसीटी समाचार
‘एनसेल इन्नोभेसन ड्रिभन क्राइसिस रेस्पोन्स आइसिटी अवार्ड २०२०’ पाइला इमरजेन्सी रिससीएटरलाई प्रदान गरिएको छ । शनिबार सोल्टी क्राउन प्लाजामा आयोजना भएको आइसिटी अवार्डमा पाइला इमरजेन्सी रिससीएटरलाई ‘एनसेल इन्नोभेसन ड्रिभन क्राइसिस रेस्पोन्स आइसिटी अवार्ड २०२०’ प्रदान गरिएको हो ।
आइसिटी अवार्ड आयोजक समितिका अध्यक्ष राजन लम्सालको अध्यक्षतामा शुरू भएको उक्त कार्यक्रममा प्रमुख अतिथिको रुपमा सरकारका प्रवक्ता एवं सञ्चार तथा सूचना प्रविधि मन्त्री पार्वत गुरुङको उपस्थिति रहेको थियो ।
त्यस्तै कार्यक्रममा विशिष्ट अतिथीको रुपमा पूर्व वातावरण, विज्ञान तथा प्रविधि मन्त्री गणेश शाहको उपस्थिति रहेको थियो । भने कार्यक्रममा अन्य विभिन्न व्यक्तित्वहरुको सहभागिता रहेको थियो ।
के हो पाइला इमरजेन्सी रिससीएटर ?
पाइला इमरजेन्सी रिससीएटर पाइला टेक्नोलोजीले विकास गरेको इन्नोभेसन हो । पाइला टेक्नोलोजीले परि रोबोट लगायतका धेरै महत्वपुर्ण इन्नोभेसनहरु बजारमा ल्याएसकेको छ । कोभिड १९ को महामारी रोकथाम गर्न सघाउने हिसाबले रोबोट र भेन्टिलेटर विकास गर्नेतर्फ पनि कम्पनीले काम गरेको छ ।
पाइला इमरजेन्सी रिससीएटर महामारीको समयमा मानिसको जीवन बचाउन उपयोगी रहेको छ । यसलाई आइसीयूको भेन्टिलेटरको सट्टा प्रयोग गर्न नमिले पनि सासफेर्न गाह्रो हुनेको लागी तत्काल प्रयोग गर्न सकिन्छ ।
यसमा धेरै पारामिटरहरु प्रयोग गरेर वृहत रुपमा मोनिटरिङ गर्न सकिेने सिस्टम रहेको छ । यो एम्बु ब्यागमा आधारित भेन्टिलेटर सिस्टम हो । यसले ४ घण्टाको ब्याट्री ब्याकअप दिन्छ । थोरै लगानीमा पनि विरामीको कठिन समस्या समाधानमा यो प्रडक्ट उपयोगी छ ।
पाइला इमरजेन्सी रिससीएटरलाई क्याटोगोरी स्पोन्सर एनसेलले ३ लाख रुपैयाँ नगद प्रदान गरेको छ । भने जेनस सोलुसनले ५ हजार डलर बराबरको अमेज वेब सर्भिसेस सेवा प्रदान गरेको छ ।
त्यस्तै गरी विजेताले ईसेवाको तर्फबाट २५ हजार रुपैयाँ बराबरको एपीआई सुविधा पनि प्राप्त गरेको छ । साथै एनसेल इन्नोभेसन ड्रिभन क्राइसिस रेस्पोन्स आइसिटी अवार्डमा उत्कृष्ट ५ मा पर्न सफल इन्नोभेसनहरुलाई हुवावेले निःशूल्क क्लाउड सुविधा समेत प्रदान गरेको छ ।
त्यस्तै विजेतालाई सरकारी स्वामित्व रहेको नेपाल टेलिकमले एक वर्ष सम्मको लागि निःशूल्क उच्च गतिको फाइबर इन्टरनेट सुविधा प्रदान गरेको छ ।
