आईसीटी समाचार
स्टार्टअप इन्डिया इन्टरनेसनल समिटमा नेपालबाट एफ्वान सफ्ट ग्रुपका अध्यक्ष विश्वास ढकालले सहभागीता जनाएका छन् । भारतका स्टार्टअपहरुलाई प्रवर्द्धन गर्न शनिबार ‘प्रारम्भः स्टार्टअप इन्डिया इन्टरनेसनल समिट’ आयोजना गरिएको थियो ।
सो समिटमा भारतका स्टार्टअपहरुसँगै बिमस्टेक सदस्य राष्ट्रहरुबाट समेत सहभागीता रहेको थियो । उक्त समिटमा प्रधानमन्त्री नरेन्द्र मोदीले भारतका स्टार्टअपहरुका लागि १ हजार करोड भारतीय रुपैयाँ बराबरको लगानी कोषको पनि घोषणा गरेका छन् ।
उक्त समिटमा एफ्वान सफ्ट तथा ईसेवाका सह संस्थापक ढकालले १७ वर्षअघि १ जनाबाट शुरू भएको कम्पनीमा अहिले ८०० भन्दा बढिले प्रत्येक्ष रुपमा रोजगारी पाएको बताएका थिए ।
‘मैले २२ वर्षको उमेरमा उद्यमशीलताको यात्रा शुरू गरेको थिए । त्यसपछि हामीले सन् २००९ मा ईसेवाको शुरुवात गरेका थियौं । जुन नेपालमा मात्र नभएर दक्षिण एशियामै पहिलो थियो,’ उनले भने ।
‘हामीले ईसेवा सुरु गर्दा नेपालमा इन्टरनेटको पेनिटेरेसन एकदमै कम थियो । ईसेवाको पहुँच सबै सामु पुर्याउन हामीले एजेन्टमा आधारित सेवा शुरू गर्यो,’ उनले भने ‘हाल हाम्रो सेवाले देशको ५० प्रतिशत जनसंख्या ओगटेको छ । हामीसँग आज १ लाख एजेन्ट छन् ।’
ढकालले भने ‘हामी आइसिटी क्षेत्रमा धेरै कर तिर्ने कम्पनी समेत हौं । हामीले डिजिटल नेपाल मिसनमा पनि सहयोग गरिरहेका छौं । नेपालमा क्युआरमा आधारित पेमेन्ट सिस्टमको शुरूवात गर्ने हामी पहिलो कम्पनी हौं ।’
प्रविधि मार्फत जनताको जीवन सहज बनाउन तथा गाउँ र सहर बीचको डिजिटल डिभाइडलाई हटाउन समेत काम गरिरहेको विश्वास ढकालले बताए ।
