आईसीटी समाचार
सञ्चार तथा सूचना प्रविधि मन्त्री पार्वत गुरूङले डिजिटल नेपाल फ्रेमवर्क र साइबर सुरक्षा बारे नेपालका विज्ञहरुसँग छलफल गरेका छन् ।
मन्त्री गुरूङले सोमबार मन्त्रालयमा आयोजित कार्यक्रममा डिजिटल नेपाल फ्रेमवर्क तथा साइबर सुरक्षा बारे सरोकारवालासँग छलफल गरेका हुन् ।
उक्त कार्यक्रममा मन्त्री गुरूङले डिजिटल नेपाल फ्रेमवर्क डिजिटल नेपालको रुपान्तरणकारी योजना भएको बताएका छन् ।
कार्यक्रममा उनले सूचना प्रविधिको विकासका लागि अन्तर्राष्ट्रिय स्तरको सूचना प्रविधि लगानी सम्मेलन आयोजना गर्ने तयारी गरिरहेको बताए । साथै एप सार्वजनिक गर्ने नाममा बजेट मात्रै खर्च गर्ने पक्षमा सरकार नभएको उनले जानकारी दिए ।
उक्त अन्तरक्रिया कार्यक्रममा विज्ञहरूले सरकारले नागरिक एप ल्याउनु धेरै ठूलो काम भएको बताएका थिए । साथै नेपालको साइबर सुरक्षामा विज्ञहरूले योगदान गर्ने प्रतिवद्दता पनि जनाएका थिए ।
डिजिटल नेपाल फ्रेमवर्क कार्यान्वयन गर्न विज्ञहरुसँग निरन्तर छलफल गर्दैं अगाडी बढ्ने मन्त्री गुरूङले बताए । सो कार्यक्रममा डिजिटल नेपाल बनाउन सरकार र नीजि क्षेत्रले गर्ने प्रयासहरुको बारेमा पनि छलफल भएको थियो ।
कार्यक्रममा सहभागीहरुले डिजिटल नेपाल बनाउने अभियानमा सरकार पूर्ण प्रतिबद्धता सहित अगाडी बड्नुपर्ने भन्दै आफ्नो आफ्नो तर्फबाट सुझाब दिएका थिए ।
मन्त्रालयले अगामी १४ गते इन्टरनेट सेवा प्रदायक र नियामक निकायसँग डिजिटल फाउन्डेसन र कनेक्टिभिटीको बारेमा छलफल गर्नेछ ।
