आईसीटी समाचार
रणनीति बनाउँदै युद्ध लड्न सकिने नेपाली गेम ‘वर्ल्ड वार फोर-एण्ड गेम्स’ आगामी अप्रिल ४ मा सार्वजनिक हुने भएको छ । २ वर्षको अध्ययन र विकास पश्चात यो गेम चैत २२ गते सार्वजनिक हुने भएको हो ।
‘वर्ल्ड वार फोर-एण्ड गेम्स’ पब्जी तथा फ्री फायर जस्तो ब्याटल गेम नभएर एउटा स्ट्राटेजिक गेम हो । यो गेम पोडामाइब नेपालले डिजाइन र डेभलप गरेको हो ।
‘वर्ल्ड वार फोर-एण्ड गेम्स’ २ जनाभन्दा बढीले खेल्न सकिन्छ । यसको स्टोरीलाइनलाई सन् २०३० मा सेट गरिएको छ । तेस्रो विश्वयुद्ध सकिएको र २०३० बाट चौथो विश्व युद्ध शुरू भएको कल्पना गरेर यो गेमको विकास गरिएको प्रोजेक्ट म्यानेजर अनुराधा भण्डारीले बताइन् । त्यसकारण यो गेमको नाम पनि वर्ल्ड वार फोर राखिएको उनले बताइन् ।
तेस्रो विश्व युद्धका कारण धेरै देशको अस्तित्व समाप्त भएको, कति मर्ज भएको र त्यसपछि ८ ओटा देश मात्रै विश्वमा रहेको गेममा कल्पना गरिएको छ । सो ८ देशमा अमेरिका, बेलायत, सयुक्त यूरोप, सयुक्त मध्यपूर्व, रसिया, चिन, जापान र भारत छन् ।
‘यसको मोडलिङमा वर्क, ट्रेन, फाइट लगायतका छन् । वर्क मोडलिङमा प्लेयरले आफ्नो इकोनोमीलाई सन्तुलन बनाउन काम गरिरहेको हुन्छ,’ भण्डारीले भनिन् ‘ट्रेन मोडलिङमा प्लेयरले आफ्नो देशलाई जिताउन सहयोग गर्छ । यसमा दुई देशबीचको रियल ब्याटल पनि छ ।’
‘यसमा फाइट गर्दा स्वास्थ्यको कुरा पनि आउँछ । हेल्थ रिस्टोर गर्न उसले खानाहरु खान्छ,’ उनले भनिन् ‘गेममा खानाहरु पाउने बजार छ । यसमा प्रडक्ट मार्केट, मोनिटरी मार्केट, स्टक मार्केट, जब मार्केट पनि छ ।’
स्टक मार्केटबाट शेयरहरू किनबेच गर्न सक्ने भयो । किनबेचको कुराहरुमा चाहिँ निश्चित रेञ्ज तोकिएको छ । यसमा अक्सन मार्केट पनि छ । जसमा कम्पनीहरु किनबेच गर्न सकिन्छ ।
यसमा देशको प्रेसिडेन्टको पार्ट पनि छ । उसले देशको कर, अर्थतन्त्र नियन्त्रण गर्छ । करको दर सेट गर्छ । साथै यसमा प्रेसिडेन्ट बन्नका लागि चुनाव पनि हुन्छ । पार्टीको चुनाव पनि हुन्छ ।
गेममा ४ वटा करियर राखिएको छ । जसअन्तरगत कामदार, सेना, राजनीतिज्ञ र व्यवसाय रहेका छन् । प्रत्येक करियरको आफ्नै फाइदा छ । प्लेयरले आफ्नो करियर छानेपछि आफुलाई बलियो बनाउन आफ्नो रणनीति प्रयोग गर्न सक्छन् ।
यसमा ब्ल्याक मार्केट राखिएको छ । गेममा स्कीनहरु पनि राखिएको छ । प्लेयरहरुले आफुलाई मन परेको स्कीन खरिद गर्न सक्छन् ।
यो गेम निःशुल्क खेल्न सकिन्छ । यो गेम बच्चा तथा टिनएजलाई भन्दा पनि २५ वर्षदेखि माथिका व्यक्तिलाई लक्षित गरेर विकास गरिएको अनुराधाले बताइन् ।
यस गेममा कुनै कुनै ठाउँमा मात्रै एनिमेसन प्रयोग गरिएको छ । गेममा सबै कुरा क्याकुलेसनमै आधारित हुन्छ । गेमको डकुमेन्ट पार्टमा काम गर्न मात्रै आफुलाई तीन महिना लागेको अनुभव प्रोजेक्ट म्यानेजर भण्डारी सुनाइन् ।
यो गेमको विकासका लागि अहिले जाभा डेभलपर चुडामणी कार्की र युनिटी डेभलपर अमिर महर्जनले काम गरिरहेका छन् । गेमको ब्याकएण्ड जाभामा हो भने फ्रण्टएण्ड चाहिँ युनिटीमा विकास भएको हो ।
अहिलेसम्म यस गेमको विकास लागि ५ जना डेभलपरले काम गरिसकेका छन् । गेमको डिजाइन तथा डेभलप पोडामाइबले गरेपनि पब्लिस चाहिँ अमेरिकामा आधारित रहेको एस्ट्रिक टेक्नोलोजीले गर्नेछ ।
वर्ल्ड वार फोर गेमको बेटा भर्सन आगामी बिहिबार सार्वजनिक हुने कम्पनीले जनाएको छ । साथै गेमको प्रि रजिष्ट्रेसन समेत खुला गरिएको छ । प्रि रजिष्ट्रेसन गर्नेले ५० गोल्ड निःशुल्क पाउने छन् ।
यो गेमको प्रि रजिष्ट्रेसन गर्न यहाँ क्लिक गर्नुहोस् । हाल यो एन्ड्रोइडमा मात्रै उपलब्ध रहेको छ । कम्प्युटरमा ब्लुस्टयाक प्रयोग गरेर यो गेम खेल्न सकिने छ । साथै केही दिनमै गेम आईओएसमा पनि उपलब्ध हुने कम्पनीले जनाएको छ ।
