आईसीटी समाचार
नेपालको एकमात्र डिटिएच सेवा प्रदायक कम्पनी डिशहोमले केही समय अगाडि स्ट्रिमिङ भिडियो अन डिमाण्ड (एक्सभिओडी) सेवा शुरु गरेको थियो ।
ग्राहकले एक्सभिओडी मार्फत आफ्नो इच्छा अनुसार फिल्म, सिरिज, शैक्षिक सामग्री तथा अन्य भिडियोहरू हेर्न सक्नेछन् ।
अहिलेलाई यो सेवा निःशुल्क उपलब्ध रहेको छ भने विस्तारै यसलाई पे मोडलमा पनि लगिने डिशहोमले जनाएको छ ।
एक्सभिओडीमा अहिले डिशहोमले आफैले उत्पादन गरेका र लाइसेन्स प्राप्त कन्टेन्टहरू मात्रै राखेको छ । एक्सभिओडीमा हलिउड, बलिउड मुभी लगायत स्वेदेशी तथा विदेशी कन्टेन्टहरू थप गर्दै जाने डिशहोमको योजना रहेको छ ।
के हो एक्सभिओडी ?
एक्सभिओडी भनेको डिशहोममा आएको नयाँ सुविधा हो । डिशहोमको सेटअप बक्समा इन्टरनेट जोडेर एक्सभिओडी सेवा प्रयोग गर्न सकिन्छ । त्यसपछि स्ट्रिमिङ गरिएको कन्टेन्टहरू मुभी, सिरिजहरू हेर्न सकिन्छ ।
कसरी प्रयोग गर्ने एक्सभिओडी ?
सबैभन्दा पहिले एक्सभिओडी सेवा प्रयोग गर्न इन्टरनेट जडान गर्नुपर्ने हुन्छ । डिशहोममा दुई तरिकाले इन्टरनेट जडान गर्न सकिन्छ । एउटा इथरनेट पोर्ट र अर्को वाईफाई डंगोल ।
इथरनेट पोर्टबाट इन्टरनेट जडान गर्न सेटअप बक्स पछाडि एउटा इथरनेट पोर्ट हुन्छ, त्यो पोर्टमा इथरनेट केबल जोडेर इन्टरनेट चलाउन गर्न सकिन्छ । त्यस्तै डिशहोमले प्रदान गर्ने वाईफाई डंगोलबाट इन्टरनेट चलाउन सेटअप बक्समा वाईफाईको युएसबी पोर्ट हुन्छ ।
यो पोर्ट अगाडि पछाडि हुन्छ । कुनै पनि पोर्टमा वाईफाई डंगोल जडान गर्न सकिन्छ । यति गरेपछि इन्टरनेट कनेक्ट गर्न सकिन्छ । वाईफाई डंगोलको शुल्क ५ सयदेखि ६ सय रूपैयाँ तोकिएको छ । डंगोल डिशहोमको डिलर, सब डिलर र पीओएसबाट पाउन सकिन्छ ।
एक्सभिओडी मार्फत भिडियोहरू कसरी हेर्ने ?
इन्टरनेट जडान भएपछि एक्सभीओडी प्रयोग गर्न डिशहोमको पुरानो रिमोटमा ‘एफएभी’ र नयाँ रिमोटमा ‘एक्सभिओडी’ बटन हुन्छ । त्यसपछि त्यो खुल्छ ।
यसमा नेपाली मुभी, नेपाली सिरिज र किड्स भनेर फरक फरक जनरहरूमा कन्टेन्टहरू राखिएको छ । यसबाट आफ्नो समयमा मन परेका भिडियोहरू हेर्न सकिन्छ ।
एक्सभिओडी सेवा प्रयोग गर्न शुल्क तिर्नुपर्छ ?
यो सेवा प्रयोग गर्न कुनै पनि शुल्क तिर्नु पर्दैन । डिशहोमका कुनै पनि प्याकेजका सक्रिय ग्राहकले एक्सभिओडीको मजा लिन सक्छन् ।
यदि तपाईंले रिचार्ज गर्नुभएको छैन भने एक्सभिओडी चलाउन सक्नु हुन्न । अबको केही समयपछि यसलाई पे मोड्युलमा समेत लगिँदै छ । एक्सभिओडी पे मोड्युलमा गए पनि फ्रीमा समेत कन्टेन्टहरू हेर्न सकिनेछ ।
