फेसबुकले ब्लक गर्याे ‘रिजाइन मोदि’ ह्यासट्याग, सो ह्यासट्यागमा १२ हजार पोस्ट रहेको

फेसबुकले ‘रिजाइन मोदि’ भन्ने ह्यासट्यागलाई अस्थायी रुपमा ब्लक गरिदिएको छ । फेसबुक प्रयोगकर्ताहरुले भारतका प्रधानमन्त्री नरेन्द्र मोदिलाई पद त्याग्नका लागि यो ह्यासट्यागको सिर्जना गरेको हो ।

यो ह्यासट्यागको सर्च रिजल्टलाई फेसबुकमा भारत र अमेरिकाका लागि लुकाइएको छ । प्रयोगकर्ताले पनि केही दिन अघि मात्रै ट्वीटरले नरेन्द्र मोदिलाई आलोचना गरेको ट्वीट लुकाउँदा निन्दा गरेका थिए ।

मोदिले महामारी नियन्त्रणमा राम्ररी काम नगरेको भन्दै ट्वीटहरु लेखिएको थियो । फेसबुकका प्रवक्ताले ह्यासट्यागहरु अब ब्लक नरहेको र त्यो समस्या किन आएको थियो भनेर हेरिरहेको बताएका छन् ।

फेसबुकले पहिले ती ह्यासट्यागले कम्पनीको समुदाय नियमहरु उल्लघंन गरेकाले ब्लक भएको जनाएको थियो । फेसबुकका अनुसार अहिले सोही ह्यासट्यागमा १२ हजार पोस्ट रहेका छन् ।