राष्ट्रिय सूचना तथा सञ्चार प्रविधि दिवसको अवसरमा नागरिक एपको फुल भर्सन सार्वजनिक हुँदै

राष्ट्रिय सूचना तथा सञ्चार प्रविधि दिवसको अवसरमा नागरिक एपको फुल भर्सन सार्वजनिक हुने भएको छ । सम्भव भएसम्मका सबै सार्वजनिक सेवाहरु मोबाइलबाटै दिने उदेश्यका साथ गत माघ २ गते नागरिक एपको बेटा भर्सन सार्वजनिक भएको थियो ।

एपमा नागरिकता नम्बर राखेकै भरमा स्थायी लेखा नम्बर (प्यान) प्राप्त गर्न सकिने भएको छ । भने सरकारलाई तिरेको करको जानकारी एपबाटै लिन सकिने छ ।

एप मार्फत नागरिकता, राहदानी, शैक्षिक प्रमाणपत्र, तथा मतदात परिचयपत्र सम्बन्धि विवरणहरु प्राप्त गर्न सकिने छ । साथै  नागरिक लगानी कोष,सामाजिक सुरक्षा कोषको खातामा जम्मा भएको रकम र ऋणको विवरण जानकारी लिन सकिने छ ।

नागरिक एपबाट हेलो सरकारमा गुनासो समेत गर्न सकिने छ । एपबाट गुनासोको सम्बोधन भयो की भएन भनेर जानकारी समेत लिन सकिने छ । एपबाट सार्वजनिक बिदाको दिन समेत सेवा लिन सकिने छ ।

पछिल्लो समय एपमा पुलिस क्लियरेन्स रिपोर्ट र स्वास्थ्य बिमा कार्यक्रम समेत नागरिक एपमा थपिएका छन् । गृह मन्त्रालयले एप प्रयोग गर्दा नागरिकता सम्बन्धि देखिएका समस्या समाधान गर्न छुट्टै प्रणाली सञ्चालनमा ल्याइसकेको छ । नागरिक एप एन्ड्रोइड र आईओएस डिभाइसमा उपलब्ध रहेको छ ।

‘समृद्ध नेपालको आधार, सूचना तथा सञ्चार प्रविधिको विस्तार’ भन्ने मूल नाराका चौथौ राष्ट्रिय आइसिटी दिवस भर्चुअल रूपमा विभिन्न कार्यक्रम आयोजना गरी मनाइँदै छ ।

सूचना तथा सञ्चार प्रविधि (आइसिटी) क्षेत्रमा काम गर्ने व्यक्ति तथा संस्थाहरुले राष्ट्रिय आइसिटी दिवसलाई विशेष रूपमा मनाउने गरेका छन् ।