आईसीटी समाचार
वेद भन्नेबित्तिकै हामीलाई मन्त्रहरू लिपिबद्ध भएको प्राचीन शास्त्र भन्ने लाग्छ । तर नेपालको शिक्षा क्षेत्रमा वेदले प्रविधिसँग जोडेर आधुनिक शिक्षा पद्धतिको ज्ञान दिइरहेको छ ।
वेद शब्द संस्कृत भाषाको ‘विद्’ धातुबाट बनेको हो, जसको अर्थ हुन्छ जान्नु वा ज्ञान । इन्ग्रिल्स प्रा.लिले वेद मार्फत नेपालमा विगत ५ वर्षदेखि शिक्षण सिकाइलाई आधुनिक प्रविधिसँग जोड्ने काम गरिरहेको छ ।
पछिल्लो समय कोभिडको कारण लामो समय लकडाउन र शिक्षण संस्थाहरू बन्द हुँदा वेदको महत्व बढेर गयो ।कोभिड–१९ र त्यसपश्चात् सृजना भएको अनलाइन लर्निङको बाध्यताले वेदको प्रयोग व्यापक रूपमा बढ्यो ।
ई–लर्निङ र डिजिटल शिक्षाको प्लाटफर्मको रूपमा अन्य प्रडक्टहरू पनि बजारमा आइरहेका नै छन् । वर्षौं देखि अरू कम्पनीहरूले पनि काम गरिरहेका नै थिए । तर पनि वेदको महत्व पौराणिक शास्त्रझैं बढ्दै गएको छ ।
निर्देश द्वा लगायतका तीन साथीहरूले शुरू गरेको इन्ग्रिल्स प्रा.लि कम्पनीमार्फत शिक्षालाई प्रविधिमैत्री बनाउने उद्देश्यले ५ वर्षअघि ‘वेद’ बजारमा आएको हो ।
वेदले विभिन्न शहरका ६०० भन्दा बढी विद्यालयमा आफ्नो सेवा दिइरहेको छ । २८ हजार शिक्षक, ६ लाखभन्दा बढी विद्यार्थी र १० लाख अभिभावकलाई वेदले जोडेको छ । यो सफलता कोभिड–१९ र त्यसपश्चात् शिक्षा क्षेत्रमा बढेको प्रविधिको प्रयोगले पनि सम्भव बनाएको हो ।
वेदले शिक्षकका लागि वेद गुरु, विद्यार्थीका लागि वेद स्टुडेन्ट्स र ई–लर्निङ प्लाटफर्मका लागि वेद सिएमएस लगायतका सेवाहरू दिइरहेको छ ।
अनलाइन लर्निङका लागि सम्पूर्ण सुविधा भएको प्लाटफर्म कम्पनीले उपलब्ध गराएको छ । विद्यार्थी, शिक्षकदेखि, एसाइनमेन्ट र रिपोर्टसम्मको लागि एकै सिस्टममा इन्टिग्रेटेड एप तथा वेब सिस्टम उपलब्ध छ ।
यस सफ्टवेयरको थप नयाँ फिचर प्रयोग गरी विद्यार्थीले घरबाटै आफ्नो होमवर्क बुझाउन सक्नेछन् । बुझाइएको सोही होमवर्कमा शिक्षकले कमेन्ट गर्न मिल्नेगरी बनाइएको छ ।
त्यस्तै विद्यार्थीलाई थप सहज बनाउन वेदले कक्षा सञ्चालनको कार्यतालिका, गृहकार्य, परीक्षाको नतिजा एसएमएसमार्फत थप सुविधा पनि दिएको छ ।
वेद सफ्टवेयर सेन्ट जेभियर, रातो बंगला, डनबस्को, ग्यालेक्सी लगायत पूर्वको इटहरी र पश्चिमको पोखराका विद्यालयहरूले समेत प्रयोग गरेका छन् ।
नेपालका ए ग्रेडका धेरै विद्यालयमा यसको प्रयोग भइरहेको छ । कम्पनी नेपाल बाहिर विभिन्न देशहरूमा पनि आफ्नो सेवा विस्तार गर्ने क्रममा रहेको छ ।
कोरोनाको कहरसँगै वेदको व्यापक प्रयोगले धेरै विद्यालयले आफ्ना विद्यार्थीलाई घरबाटै सहज तरिकाले पठनपाठनमा निरन्तरता दिन सकेका छन् । अब पूर्णरूपमा अनलाइन लर्निङका लागि वेदले भरपर्दो सेवा दिन सक्नेछ ।
कोरोनाले धेरैलाई संकटको रूपमा ल्याए पनि वेद (इन्ग्रिल्स)लाई अवसरको रूपमा ल्याइदिएको छ । यसै वर्ष मात्र कम्पनीले आफ्नो कारोबार पनि करोडभन्दा बढी गरिसकेको अवस्था छ । कम्पनीको ग्रोथ बढ्दै गएको छ ।
अहिले तीनतले बिल्डिङ पूर्णरूपमा भाडामा लिएर ५० भन्दा बढी सहकर्मीको साथ कम्पनी अघि बढिरहेको छ । धेरै स्टार्टअपहरूको लागि यो सफलताले प्रोत्साहन पनि गर्नेछ ।
