आईसीटी समाचार
बजारमा आउन लागेको नयाँ भुक्तानी सेवा प्रदायक (पिएसपी) ‘नमस्ते पे’ दुई हप्ताभित्र संचालनमा आउने भएको छ । सेवा संचालनको अन्तिम तयारीमा रहेको नमस्ते पेलाई जेठ मसान्तसम्म सुरु गर्ने तयारी भइरहेको छ ।
नेपाल टेलिकम र राष्ट्रिय वाणिज्य बैंकको संयुक्त उपक्रम (ज्वाइन्ट भेन्चर)मा नमस्ते पे संचालनमा आउँदै छ ।
कोरोना संक्रमणले सामान ढिलाइ भए पनि अब संचालनको अन्तिम तयारी भइरहेको नेपाल टेलिकमका प्रबन्ध निर्देशक डिल्ली अधिकारीले बताए ।
‘अहिले हामीले कामलाई तीव्रता दिएका छौं । इन्टरकनेक्सन सम्झौता भइरहेकाछन्,’ अधिकारीले भने, ‘सम्भवत यो जेठको मसान्तसम्म सेवा संचालनमा ल्याउँछौं ।’
कोरोना संक्रमणका कारणले उपकरण आयातमा असर हुदा संचालनमा आउन ढिला भएको उनको भनाइ छ ।
कार्गो प्लेन नपाएर, नियमित उडान नभएका कारणले समयमा सामान आउन सकेका छैनन् । सामान ल्याएर जडान गर्ने र सिस्टम चलाउने बेलामा सप्लायर कम्पनीका व्यक्तिहरुलाई कोरोनाबाट संक्रमित हुदा थप समस्या भएको थियो ।
बजारमा धेरै कम्पनी भएर प्रतिस्पर्धाको चुनौति भए पनि अहिले बजारमा विश्वासशिलो पार्टन चाहिएकोले नमस्ते पे छिट्टै बजारमा स्थापित हुने उनको भनाइ छ ।
‘विश्वास गर्न लागि कस्तो कम्पनी आएको हो भन्नेमा भर पर्छ,’ अधिकारीले भने, ‘नेपाल टेलिकम र वाणिज्य बैंक दुवै सरकारी कम्पनी भएकाले विश्वास आर्जन गर्छ।’
अहिले मुलुकको कुल भुक्तानीको १० प्रतिशतभन्दा कम डिजिटल कारोबारमा छ । यसलाई बिस्तार गर्नु पर्ने र त्यसको लागि डिजिटल पेमेन्ट कम्पनीले काम गर्दै जानु पर्ने उनको भनाइ छ ।
साथै यसमा अन्तर्राष्ट्रिय स्तरको सलुसन ल्याएको हुनाले डिजिटल पेमेन्ट कम्पनीमा छिट्टै मार्केट लिड गर्छौ,’ उनले भने, ‘क्यासलेस सोसाइटी बनाउनमा यसले सहयोग गर्छ भन्ने अपेक्षा छ ।’
अहिले पनि हाम्रो समाज भनेको क्यासलाई नै पैसा मान्ने खालको भएको र चेकलाई पनि पैसा नमान्ने अवस्थामा भएकाले यसमा अझ गर्नु पर्ने काम भएको उनको भनाइ छ ।
कम्पनीको अधिकृत पुँजी र चुक्तापँजीका सबैभन्दा धेरै छ । कम्पनीको सहयोगमा ‘जायन्ट’ कम्पनीको व्याकअप भएकाले यसको संचालन गर्न सजिलो र छिट्टै उपभोक्ताको विश्वास जित्ने अधिकारीले बताए ।
नेपाल राष्ट्र बैंकले जारी गरेको विवरणअनुसार नेपाल डिजिटल पेमेन्ट्सको चुक्ता पुँजी ४० करोड रुपैया रहेको छ । यही चैत ३ गते राष्ट्र बैंकबाट ‘नमस्ते पे’ले स्वीकृत पाएको थियो ।
चुक्ता पुँजिका आधारमा हेर्दा नेपाल राष्ट्र बैंकबाट स्वीकृत प्राप्त २८ वटा भुक्तानी सेवा प्रदायकमा सबैभन्दा ठूला नमस्ते पे बनेको छ ।
