आईसीटी समाचार
भारतको बम्बे उच्च अदालतमा बिहिबार लुडोलाई कौशलको खेल नभई भाग्यको खेल घोषणा गर्न रिट दायर गरेको छ ।
यो रिट महाराष्ट्र नव निर्माण सेनाका अधिकारी केशव मुलेले दायर गरेका हुन् । उनको रिटमा मान्छेहरुले पैसा हालेर ‘लुडो सुप्रिम एप’ भन्ने गेम खेल्न थालेको बताइएको छ ।
यो महाराष्ट्र रोकथाम जुवा ऐन, १८८७ को सेक्सन ३,४ र ५ अनुसार प्रतिबन्धित रहेको छ । सोही कारणले लुडो जुवाका रूपमा फैलन थालेका भन्दै लुडो एपसँग सम्बिन्धत व्यक्तिहरु र व्यवस्थापन समितिलाई सजाय दिन माग गरेका छन् ।
एपमा खेल्दा प्रति व्यक्ति ५ रुपैयाँको दाउ लाग्ने र विजेताले १७ रुपैयाँ पाउने हुँदा यसले धेरै प्रयोगकर्ताहरुलाई आर्कषित गरिरहेको पनि पाइएको छ ।
यो भन्दा पहिले मुले मजिस्ट्रेट कोर्ट पुग्दा कोर्टले यसलाई कौशलको खेल हो भन्ने बताएको थियो । मजिस्ट्रेट कोर्टमा आफ्नो एफआइआर दर्ता नभएपछि उनी उच्च अदालत पुगेको बताइएको छ । यो केसको सुनुवाइ २२ जुनमा हुने छ ।
