आईसीटी समाचार
वैशाख महिनामा अधिकांस विद्युतीय कारोबारमा कमी आएको छ। मुलुकमा विद्युतीय कारोबार वृद्धि भइरहेको बेलामा दोस्रो पटकको लकडाउन सुरु भएको महिनामा चैतमा भन्दा कारोबार घटेको हो ।
अधिकांस विद्युतीय माध्यमका कारोबार घटेको बेला मोबाइल बैंकिङको कारोबार भने केही मात्रामा बढेको छ ।
नेपाल राष्ट्र बैंकले सार्वजनिक गरेको चालु आर्थिक वर्षको दश महिनाको तथ्यांकअनुसार चैत महिनामा भन्दा मोबाइल बैंकिङ कारोबार वैशाखमा बढेको छ ।
तथ्यांकअनुसार ४८ अर्ब ८८ करोड ७० लाख रुपैयाँको मोबाइल बैंकिङ कारोबार भएको छ । यो चैत महिनाको २३ करोड ५० लाख रुपैयाँले बढी हो । चैत महिनामा मोबाइल वैंकिङबाट ४८ अर्ब ६५ करोड ५२ लाख रुपैयाँको कारोबार भएको थियो ।
मोबाइल बैंकिङको कारोबारसँगै यसको भुक्तानी संख्या (ट्रान्जेक्सन नम्बर) मा पनि वृद्धि भएको छ । चैत महिनामा मोबाइल बैंकिङको ट्रान्जेक्सन संख्या १ करोड १० लाख ४७ हजार ४ सय ७४ रहेकोमा वैशाख महिनामा १ करोड १६ लाख १६ हजार ५ सय ६६ पुगेको छ ।
यो महिना एटिएम, कनेट आईपीएस, इन्टरनेट वैंकिङ, मोबाइल वालेट, क्युआर कोड, पिएसओ, इकमर्शलगायतका माध्यमबाट हुने विद्युतीय भुक्तानी घटेको छ ।
लकडाउनका कारण बजार बन्द भएसँगै वैशाख महिनामा क्युआर कोडबाट हुने भुक्तानी घटेको छ । चैतमा २ अर्ब ७२ करोड २० लाखको क्युआर कोडबाट भुक्तानी भएकोमा बैशाख महिनामा २ अर्ब ५२ करोड ९० लाखको भुक्तानी भएको छ ।
त्यस्तै, मोबाइल वालेटबाट हुने भुक्तानी चैतमा ११ अर्ब २ करोड १० लाख रुपैयाँ भएकोमा वैशाखमा १० अर्ब १० करोड ६० लाख भएको छ ।
त्यस्तै, इन्टरनेट बैकिङबाट हुने कारोबार १० अर्ब २१ करोड ५० लाखबाट १० अर्ब ८ करोडमा झरेको छ । त्यस्तै, पछिल्लो समय उच्च कारोबार गरिरहेको कनेट आईपीएसबाट हुने भुक्तानी पनि वैशाख महिनामा घटेको छ ।
तथ्यांकअनुसार चैतमा २ खर्ब ११ अर्ब ४३ करोड २० लाख रुपैयाँको भुक्तानी भएकोमा वैशाखमा १ खर्ब ७३ अर्ब ८७ करोड ९० लाखको कारोबार भएको छ ।
त्यस्तै, आटीजीएस, इसीसी, डेविट कार्ड, क्रेडिट कार्डबाट हुने भुक्तानीमा पनि कमी आएको छ ।
