आईसीटी समाचार
नेपाल टेलिकमको मोबाइल ब्यालेन्सबाट कारोबार गर्न नपाइने नेपाल डिजिटल पेमेन्ट्स कम्पनी लिमिटेडका प्रमुख कार्यकारी अधिकृत (सीईओ) कृष्णप्रसाद भण्डारीले बताएका छन् ।
बुधबार नेपाल टेलिकमको गण्डकी प्रदेश कार्यालयले आयोजना गरेको पत्रकार भेटघाट तथा अन्तर्क्रिया कार्यक्रममा भण्डारीले यस्तो बताएका हुन् ।
उनले भने, ‘यो बीचमा पटक पटक मिडियामा उठ्ने गरेको एउटा विषय छ । यो नेपाल टेलिकमको कम्पनी भएको हिसाबले मोबाइलको ब्यालेन्सबाटै कारोबार गर्न पाइने होकी भन्ने खालका जिज्ञासाहरू यताकता आउँछन् । त्यो जिज्ञासालाई यो मञ्चबाटै प्रष्ट पार्न चाहन्छु ।’
नेपाल टेलिकमको मोबाइलको ब्यालेन्सबाट कारोबार गर्न नपाइने उनले प्रष्ट पारे । ‘मोबाइलको ब्यालेन्सबाट खरिददारी गर्न, बिल तिर्न सकिदैन्,’ भण्डारी भने, ‘किनभने मोबाइलको ब्यालेन्स अहिले पनि सेवाको रूपमा रहेको ब्यालेन्स हो । त्यो नगद वा रकमको रूपमा लगेको ब्यालेन्स होइन । त्यो चाहिँ दूरसञ्चार सेवाका लागि मात्रै प्रयोग गर्न भनेर छुट्याइएको चीज हो ।’
त्यसलाई पुनः पैसामा परिवर्तन गरेर अन्य सेवा तथा वस्तु खरिद गर्न नसकिने उनले जानकारी दिए । नमस्ते पे मोबाइल ब्यालेन्सबाट नचल्ने उनको भनाइ छ ।
नमस्ते पेमा बैंक तथा एजेन्टबाट ब्यालेन्स लोड गर्न सकिने उनी बताउँछन् । ‘धेरै जना एजेन्ट, सुपर एजेन्टसँग सम्झौता गरिसकेका छौं । उहाँहरूले छिट्टै काम शुरू गर्नुहुन्छ’ उनले भने ।
नमस्ते पेबाट क्युआर कोड स्क्यान गरी भुक्तानी गर्न सकिने प्रावधान ल्याउने उनले बताए । अहिले स्मार्ट क्युआरसँग साझेदारी गरेर त्यसलाई अगाडि बढाइएको भण्डारी बताउँछन् ।
उनी भन्छन् ‘हाम्रो एपलाई त्यसका लागि तयार गर्ने, अझै परिमार्जन गर्ने कामहरू गर्दैछौं ।’ एप्पलको एप स्टोरमा एक दुई हप्तामा नमस्ते पेको एप आउने आशा गरेको भन्डारी बताउँछन् ।
‘हिजोदेखि यसको शुरूवात मात्रै गरिएको छ । यसमा धेरै सुधारहरू गर्नुपर्ने छ,’ भण्डारीले कार्यक्रममा भने, ‘त्यसका लागि यहाँहरूको सुझाब, सल्लाह र प्रतिक्रियाले ठूलो महत्व राख्छ । त्यसले हामीलाई बजारको आकांक्षाको पनि जानकारी दिन सक्छ ।’
यसमा थप सुधार गर्न र नयाँ सेवा आउन केही समय लाग्ने र त्यसका लागि धैर्य गर्न उनले आग्रह गरे ।
