आईसीटी समाचार
टेस्लाको एप सर्भर हिजो अर्थात २१ नोभेम्बरमा केही घण्टाका लागि बन्द भएपछि केही सेवाग्राहीहरु आफ्नो गाडी बाहिरै लक भएका थिए । टेस्लाको एप सर्भर नचल्दा विश्वव्यापी रुपमानै टेस्लाको एप चल्न पाएको थिएन । यसले गर्दा उपभोक्ताहरुले आफ्नो कारसँग कनेक्ट गर्न पाएका थिएनन ।
कीकार्ड प्रयोग नगरेर फोन प्रयोग गर्ने उपभोक्ताहरु कार बाहिरै लक हुनुपर्ने समस्या धेरैले भोग्नु परेको थियो । सुरुमा यो समस्या उत्तर अमेरिकामा मात्रै देखिएको कम्पनीले अनुमान लगाएको थियो तर पछि दक्षिण कोरियाका एक चालकले पनि आफ्नो कार नचलेको भनेर ट्वीट गरेका थिए ।
यो ट्वीटको रिप्लाईमा एलन मस्कले चेकिङ्ग भनेर लेखेका थिए । यो कुराको बारेमा सबैभन्दा पहिले इलेक्ट्रेकले रिपोर्ट गरेको थियो । त्यसपछि अरु ट्वीटर प्रयोगकर्ताहरुले पनि आ आफ्नो गाडीमा यही समस्या आईरहेको ट्वीट गरेका थिए ।
क्लाउड सेवामा प्रयोगकर्ताहरुले धेरै भरपर्न थालेपछि यो गाडीबाहिर लक हुने समस्या बेलाबेलामा अरु विद्युतिय गाडीहरुमा पनि भईरहन सक्छ । विद्युतिय गाडीको प्रयोगकर्ताहरुले ब्याकअपको रुपमा कीकार्ड पनि बोक्दा सहज हुने यस घटनाले देखाएको छ ।
