आईसीटी समाचार
‘कोड फर नेपाल’ ले डेटा सम्बन्धि सीप विकास गर्न डेटा फेलोशिप संचालन गर्ने भएको छ । तीन महिना लामो यस फेलोशिपको मुख्य उद्देश्य नेपाली युवाहरुलाई डेटा सम्बन्धि सीप सिकाउने तथा रोजगारी प्रदान गर्ने रहेको छ ।
फेलोशिपले यस वर्ष ४०० भन्दा बढी नेपालीहरूको डाटा सीप विकास गरी उनीहरूको जीवनमा परिवर्तन ल्याउने लक्ष्य राखेको छ ।
‘कोड फर नेपाल’ नेपालमा डिजिटल साक्षरता प्रवर्द्न गरी ओपन डाटाको प्रयोग बढाएर नेपाललाई डिजिटल रूपमा सशक्त बनाउन सन् २०१४ मा स्थापना गरिएको स्वयंसेवकहरूको एउटा समुदाय हो ।
कोड फर नेपालले डेटाक्याम्पको सहकार्यमा यस फेलोशिप सञ्चालन गर्न लागेको हो । यस फेलोशिपका प्रत्येक सहभागीले ३९९ अमेरिकी डलर बराबरको प्रिमियम डाटाक्याम्प सदस्यता प्राप्त गर्नेछन् ।
साथै उनीहरुले रोजगारीका विभिन्न अवसरहरु पनि प्राप्त गर्नेछन्। फेलोशिपका सम्पूर्ण सहभागीहरुले प्राप्त गर्ने कार्यक्रमको कुल मौद्रिक मूल्य २ करोड नेपाली रुपैयाँ भन्दा बढी छ ।
फेलोशिपमा चार चरणहरु हुनेछन् डाटाक्याम्प कोर्स, असाइनमेन्ट, सफ्ट स्किल्स डेभलपमेन्ट, र सपोर्ट । जसमा डाटाक्याम्प कोर्स अन्तर्गत सहभागीहरुले आफ्नो डेटा र डिजिटल सीपहरू बृद्धि गर्नेछन् ।
यो कोर्स तीन महिनाभित्र सक्नु पर्नेछ । त्यसपछि असाइनमेन्ट अन्तर्गत फेलोहरूले असाइनमेन्टलाई ब्लग पोष्ट, डाटा भिजुअलाइजेशन वा प्रकाशनयोग्य आउटपुटको कुनै पनि रूपको रूपमा पेश गर्नुपर्नेछ ।
यसरी प्रकाशन भएका प्रत्येक ब्लग पोष्टको ५ हजार रुपैयाँका दरमा प्रदान गरिनेछ । नेपाल भित्र र बाहिर बस्ने नेपालीहरू यस फेलोशिपको लागि आवेदन दिन सक्ने छन्।
इन्टरनेट र ल्यापटपको पहुँच भएका नेपाली युवाहरूले आफूलाई उपयुक्त हुने समयमा डेटाक्याम्पमा उपलब्ध विभिन्न सिकाई सामग्रीहरु अध्ययन गरेर यस कार्यक्रमको भरपूर फाईदा लिन सक्नेछन् ।
फेलोशिपको अवधि ३ महिनाको हुनेछ । यसका लागि साधारण प्रोग्रामिङको ज्ञान भएको हुनुपर्नेछ । आईटी र प्रोगामिङ्मा आधारभुत ज्ञान भएका र डेटा सीप विकास गर्न खोज्ने नेपालीहरुलाई लक्षित गरिएको कोड फर नेपालले जनाएको छ । आवेदन दिने अन्तिम समय डिसेम्बर १५ सम्म रहेको छ ।
कसरी आवेदन दिने ?
डाटा फेलोशिपको लागि आवेदन खुला भईसकेको छ । इच्छुक सहभागीहरूले यहाँ क्लिक गरी फारम भरेर फेलोशिपको लागि आवेदन दिन सक्नेछन्।
छानिएका उम्मेदवारहरूलाई आवेदनको म्याद सकिएपछि अन्तर्वार्ताका लागि बोलाइनेछ । चयन गरिएका सहभागीहरुले फेलोशीपमा भर्ना भएको तीन महिनाभित्र कोर्सका सबै चरणहरू पूरा गर्नुपर्नेछ ।
यस फेलोशिपले सहभागीहरूको डेटा सम्बन्धि सीप विकास गरेर नयाँ अवसरहरूका ढोका खोल्ने लक्ष्य राख्छ । सहभागीहरूले फेलोशीप अवधिपश्चात विभिन्न परियोजनामा सहभागी भई आयआर्जनका विविध अवसरहरु प्राप्त गर्नेछन् ।
