आईसीटी समाचार
नेपाल बैंक पायोनियर आइसिटी अवार्ड २०२१ सूचना प्रविधि विज्ञ मनोहर कुमार भट्टराईलाई प्रदान गरिएको छ । शुक्रबार सोल्टी होटेलमा आयोजना भएको आइसिटी अवार्डको ग्राण्ड फिनाले कार्यक्रममा भट्टराईलाई पायोनियर आइसिटी अवार्ड २०२१ प्रदान गरिएको हो ।
नेपालको सूचना प्रविधि क्षेत्रमा उल्लेख्य योगदान पुर्याएका व्यक्तिलाई यो अवार्ड प्रदान गरिन्छ । मनोहर कुमार भट्टराई नेपालको आईसिटी विज्ञ हुन् ।
सिस्टम्स इन्जिनियर पढेका मनोहरेको आइसिटी क्षेत्रमा १० वर्षभन्दा बढीको योगदान रहेको छ । मनोहरले नेपाल सरकारले बनाएको उच्चस्तरीय सूचना प्रविधि आयोगको उपाध्यक्ष भएर समेत काम गरिसकेका छन् ।
नेपालको पहिलो आईटी नीति, राष्ट्रिय ब्रोडब्याण्ड नीति र राष्ट्रिय ब्रोडब्याण्डको गुरू योजना बनाउनमा उनको विशेष भूमिका छ । ई-गभर्मेन्टको गुरू योजना निर्माणमा समेत उनको योगदान छ, जुन अहिले प्रधानमन्त्री कार्यालयमा कार्यान्यवन भइरहेको छ ।
सयुक्त राष्ट्र संघको आर्थिक तथा सामाजिक आयोगको नेतृत्वमा पहल भएको एशिया प्यासिफिक इन्फर्मेसन सुपरहाइवेमा एक विज्ञका रूपमा समेत काम गरेका छन् । उनी इन्टरनेट गभर्नेन्स इन्स्टिच्युट, आइसिटी फर डेभलपमेन्ट र समृद्धि ग्रुपका अध्यक्ष हुन् ।
