आईसीटी समाचार
इन्टेलले ओहायोमा चिप निर्माण गर्ने उद्योग खोल्न २० बिलियन डलर लगानी गर्ने भएको छ । टाइमसँगको अन्तर्वातामा इन्टेलले ओहायोमा ठूलो चिप निर्माण गर्ने ठाउँको विकास गर्न लागेको बताएको हो ।
इन्टेलका सिईओ प्याट जेलसिगंरले यो पृथ्वीकै सबैभन्दा ठूलो सिलिकन निर्माण गर्ने ठाउँ हुने विश्वास राखेका छन् । न्यू आल्बानीको एक हजार एकर जमिनमा यस उद्योगको विकास गरिनेछ ।
इन्टेलको योजना अनुसार त्यहाँ दुई ओटा प्लान्ट बसाएर ३ हजार जना कर्मचारीहरूलाई रोजगार प्रदान गरिनेछ । यही वर्ष निर्माण गर्ने भवन बनाउन सुरु गरिनेछ र कम्पनीले यो प्रोजेक्ट सन् २०२५ सम्ममा सम्पन्न हुने आशा गरेको छ ।
सन् २०२१ को ब्लुमबर्गको रिपोर्ट अनुसार अमेरिकी सरकारले इन्टेललाई चीनमा कारखाना खोल्न सख्त मनाही गरेको थियो, जसका कारण उद्योग अमेरिकामै बनाइने भएको हो ।
चिप अभावको समस्यालाई कम गर्नका लागि यो पहल सुरू गरिएको हो । कम्पनीले ३८ ओटा बेग्लाबेग्लै ठाउँहरु हेरेपछि अन्तत ओहायोलाई छानेको हो ।
भविष्यमा यस प्रोजेक्टलाई २ हजार एकर जमिनका विस्तार गरेर आठ ओटा प्लान्ट बसाउने इन्टेलको योजना पनि रहेको छ ।
