आईसीटी समाचार
काठमाडौं । प्रतिनिधि सभाका सांसद प्रकाश पाठकले अनलाइन गेमिङ एप, विशेष गरी फ्री फायर जस्ता खेलमाथि प्रतिबन्ध लगाउन सरकारसँग माग गरेका छन् । प्रतिनिधि सभाको बैठकमा धारणा राख्दै सांसद पाठकले अनलाइन गेमको बढ्दो लतले बालबालिकामा गम्भीर मानसिक समस्या निम्त्याइरहेको दाबी गरे ।
उनले बारामा भएको एक घटनाको उदाहरण दिँदै फ्री फायर खेल्न बानी परेका एक बालकले मोबाइल फोन खोसिएपछि आत्महत्या गरेको उल्लेख गरे । उनका अनुसार अनलाइन गेमिङको लतका कारण बालबालिका मात्र नभई परिवार समेत प्रभावित भइरहेका छन् ।
“हाल लाखौं बालबालिका अनलाइन गेमिङको लतसँगै मानसिक समस्यासँग जुधिरहेका छन्,” उनले भने, “यसले पारिवारिक विखण्डनका साथै आपराधिक घटनामा समेत वृद्धि गरिरहेको छ ।”
सांसद पाठकले गेमिङ एपहरूको प्रभावका कारण बालबालिकामा देखिने समस्या दिनप्रतिदिन बढ्दै गएको उल्लेख गर्दै यस्ता अनलाइन गेममाथि तत्काल प्रतिबन्ध लगाउन माग गर्दै सरकारको ध्यानाकर्षण गराएका छन् ।
