आईसीटी समाचार
गुगलले जेमिनीमा ‘पर्सनल इन्टेलिजेन्स’ फिचरलाई वैकल्पिक रूपमा सुरु गरेपछि अब यही फिचर सर्चको एआई मोडमा पनि एकीकृत गर्ने घोषणा गरेको छ।
पर्सनल इन्टेलिजेन्सले प्रयोगकर्ताका गुगल एपहरूबाट जानकारी लिएर उनीहरूको इतिहास र रुचिअनुसार उत्तरहरू तयार गर्छ।
सर्चका लागि विशेष रूपमा, प्रयोगकर्ताले अनुमति दिएमा पर्सनल इन्टेलिजेन्सले जीमेल र गुगल फोटोसमा रहेका जानकारीसमेत प्रयोग गर्न सक्नेछ।
उदाहरणका लागि, एआई मोड प्रयोग गरेर कपडा किनमेल गर्दा यस फिचर सक्रिय भएमा गुगलले प्रयोगकर्ताले पहिले किनेको ब्रान्ड वा मोडेलसँग मिल्दोजुल्दो वस्तु सिफारिस गर्न सक्छ।
त्यसैगरी, जीमेलमा विमान टिकट वा अन्य यात्रा सम्बन्धी रिजर्भेसन देखिएमा, गन्तव्य र मौसमअनुसार उपयुक्त कपडाहरू सिफारिस गर्न पनि सक्नेछ।
पर्सनल इन्टेलिजेन्स गुगलको जेमिनी ३ एआई मोडेलमा आधारित छ। कम्पनीका अनुसार, जीमेल इनबक्स वा गुगल फोटोसको जानकारी प्रयोग गरेर एआई मोडेललाई प्रशिक्षण दिइँदैन।
तर प्रयोगकर्ताले दिएका प्रॉम्प्ट र एआई मोडबाट प्राप्त प्रतिक्रियाहरू भने प्रयोग गरिन्छ। गुगलले कहिलेकाहीँ सिफारिसहरू पूर्ण रूपमा सही नहुन सक्ने चेतावनी पनि दिएको छ, किनकि एआईले सन्दर्भ पूर्ण रूपमा बुझ्न नसक्ने वा फरक विषयहरूबीच गलत सम्बन्ध जोड्न सक्ने सम्भावना रहन्छ।
हाल पर्सनल इन्टेलिजेन्स एक प्रायोगिक फिचरका रूपमा गुगल ल्याब्समार्फत उपलब्ध गराउन थालिएको छ। अमेरिकामा रहेका गुगल एआई प्रो र अल्ट्रा सब्स्क्राइबरहरूले अंग्रेजी भाषामा सेवा प्रयोग गर्दा स्वचालित रूपमा यसमा पहुँच पाउनेछन् र एआई मोडलाई जीमेल तथा गुगल फोटोससँग जोड्न सक्नेछन्।
यद्यपि, यो सुविधा हाल व्यक्तिगत गुगल अकाउन्टका लागि मात्र उपलब्ध हुनेछ भने वर्कस्पेस अकाउन्टमा भने पछि मात्र उपलब्ध गराइने गुगलले जनाएको छ।
