आईसीटी समाचार
अमेजन पनि टिकटकको अमेरिकी स्वामित्व किन्न इच्छुक देखिएको छ । टिकटक बिक्री गर्नुपर्ने समयसीमा नजिकिदै गर्दा अमेजन पनि सम्बावित खरिदकर्ताको सूचीमा थपिएको हो ।
न्यु योर्क टाइम्सका अनुसार अमेजनले अन्तिम समयमा बिडको प्रस्ताव राखेको छ र उपराष्ट्रपति जेडी भान्स तथा वाणिज्य सचिवलाई आफ्नो प्रस्तावबारे जानकारी गराएको छ ।
तर, अमेजनले यो प्रस्ताव राख्न किन ढिला गर्यो भन्ने स्पष्ट छैन । टिकटकले अप्रिल ५ भित्र सम्झौता गर्नुपर्नेछ, यद्यपि राष्ट्रपति डोनाल्ड ट्रम्पले आवश्यक परेमा म्याद लम्ब्याउने संकेत गरेका छन् ।
रिपोर्ट अनुसार, ह्वाइट हाउसका अधिकारीहरू अमेजनको प्रस्तावलाई गम्भीर रूपमा लिएका छैनन् । अमेजनले पनि यसबारे कुनै टिप्पणी गर्न अस्वीकार गरेको छ ।
अमेज़नसँगै अन्य थुप्रै कम्पनी र लगानीकर्ताहरूले पनि टिकटक किन्न प्रस्ताव राखेका छन् । युट्युबर मिस्टर बिस्ट, रेडिटका सहसंस्थापक एलेक्सिस, परप्लेक्सिटी एआई सम्भावित खरिदकर्ताका रूपमा रहेका छन् ।
यद्यपि, समयसीमा नजिकिए पनि टिकटकको भविष्यबारे निर्णय कहिले लिइन्छ भन्ने अझै स्पष्ट छै न। ट्रम्पले शनिबारको समयसीमाभन्दा अघि नै सम्झौताको घोषणा गर्न चाहेको बताएका छन् ।
