दुईवटा नयाँ भिजन प्रो मोडलमा काम गर्दै एप्पल

एप्पलले भिजन प्रोका दुईवटा नयाँ मोडलमा काम गरिरहेको जानकारी बाहिरिएको छ । ब्लूमबर्गका अनुसार, एप्पलले सस्तो मूल्यमा भिजन प्रो हेडसेट सार्वजनिक गर्ने अघिल्लो अफवाहलाई त्यागेको छैन । 

मार्क गुर्मनले आफ्नो 'पावर अन' न्युजलेटरमा उल्लेख गरेअनुसार, कम्पनीले हाल दुईवटा नयाँ मोडलहरू विकास गरिरहेको छ — एउटा पहिलो पुस्ताको हेडसेटभन्दा हल्का र सस्तो हुनेछ भने अर्को मोडल म्याकसँग जोडिने (टेदर हुने) खालको हुनेछ।

गुर्मनका अनुसार, एप्पलले सुरुमा यस्तो प्रणाली एआर चश्माका लागि विचार गरेको थियो, तर पछि यो अवधारणा भिजन प्रोमा सारिएको हो ताकि प्रयोगकर्ताको म्याक डिस्प्लेको स्ट्रीमिङ वा उच्चस्तरीय इन्टरप्राइज एप्लिकेसनहरूमा जडानको लागि अल्ट्रा-लो-लेटेन्सी सिस्टम निर्माण गर्न सकियोस्।

यद्यपि एप्पलको अन्तिम लक्ष्य भनेको यस्तो एआर चश्मा बनाउनु हो जुन सामान्य चश्माझैं प्रयोग गर्न सकिने गरी व्यावहारिक र सहज होस् । गुर्मनका अनुसार, एप्पलका सीईओ टिम कुक मेटा भन्दा अगाडि उद्योग-नेतृत्व गर्ने उत्पादन विकास गर्न लागिपरेका छन् ।