आईसीटी समाचार
भूटानले राष्ट्रिय पूर्वाधार र आर्थिक विकासका लागि बिटक्वाइन प्रयोग गर्ने इतिहासमै सबैभन्दा महत्वाकांक्षी कदम चालेको छ। सरकारले आफ्नो कुल बिटक्वाइन होल्डिङको १० हजार बिटक्वाइन गेलेफु माइन्डफुलनेस सिटी (GMC) नामक विशेष प्रशासनिक क्षेत्रमा लगानी गर्ने घोषणा गरेको छ।
सरकारी अधिकारीहरूका अनुसार, यो लगानी तत्काल खर्चको लागि नभई दीर्घकालीन पूँजी संरक्षण र बिटक्वाइनको मूल्य वृद्धिबाट लाभ उठाउने उद्देश्यले गरिएको हो। भूटानले यसको लागि सुरक्षा ऋण, ट्रेजरी र यिल्ड रणनीति, साथै दीर्घकालीन होल्डिङ जस्ता विकल्पहरू प्रयोग गर्ने योजना बनाएको छ।
गेलेफु माइन्डफुलनेस सिटी भूटानको अर्थतन्त्रलाई जलविद्युत र पर्यटन बाहेकका क्षेत्रहरूमा विविध बनाउने प्रयासको केन्द्रबिन्दु हो। सिटीको विकास योजना सन् २०२४ मा सुरु भएको थियो र यसमा वित्त, प्रविधि, हरित ऊर्जा, स्वास्थ्य, कृषि र उच्च मूल्यको पर्यटन क्षेत्र समावेश छन्।
राष्ट्रिय दिवसको अवसरमा बोल्दै भूटानका राजा जिग्मे खेसेर नमग्याल वाङचुकले भनेका छन्, ‘यो प्रतिबद्धता हाम्रो जनता, हाम्रो युवा र हाम्रो राष्ट्रका लागि हो। प्रत्येक भूटानी नागरिक जीएमसीको संरक्षक, शेयरधनी र लाभग्राही हुनेछ।’
भूटानले केही वर्षदेखि बढी भएको जलविद्युत् ऊर्जाबाट बिटक्वाइन माइनिङ गर्दै आएको छ। अनुमान अनुसार, भूटानसँग ६ हजारदेखि ११ हजार बिटक्वाइन रहेको छ, जसले देशलाई विश्वकै ठूलो बिटक्वाइन होल्डिङ गर्ने राष्ट्रहरूमध्ये एक बनाएको छ।
यसैबीच, भूटानले पर्यटन क्षेत्रमा क्रिप्टो भुक्तानी, भूटान टोकन (TER), र राष्ट्रिय डिजिटल पहिचान प्रणाली जस्ता ब्लकचेन आधारित परियोजनाहरू पनि सञ्चालनमा ल्याइसकेको छ। जीएमसी आफैं बिटक्वाइन र अन्य दुई क्रिप्टोकरेन्सीलाई रणनीतिक भण्डारको रूपमा राख्ने पहिलो स्थानीय प्रशासनिक क्षेत्र बनेको छ।
१० हजार बिटक्वाइनको मूल्य हालको बजार अनुसार करिब १ खर्ब २४ अर्ब रुपैयाँ पर्ने अनुमान गरिएको छ।
