आईसीटी समाचार
नेपाल क्रिकेट संघ (क्यान) ले नेपाल प्रिमियर लिग २०२५ का लागि लाइभ फिड उत्पादन गर्नका लागि बोलपत्र आह्वान गरेको छ ।
कात्तिक १२ गते सूचना प्रकाशित गर्दै क्यानले इच्छुक र योग्य बोलकर्तालाई बोलपत्र पेश गर्न आग्रह गरेको हो ।
बोलपत्र सम्बन्धि दस्तावेजहरु नेपाल क्रिकेट संघको मुलपानी, काठमाडौंस्थित कार्यालयबाट कात्तिक १७ गते (नोभेम्बर ३, २०२५) सम्म कार्यालय समयभित्र प्राप्त गर्न सकिनेछ । यसका लागि कम्पनी वा फर्मको दर्ता प्रमाणपत्रको प्रतिलिपि र १० हजार रूपैयाँ शुल्क लाग्ने छ ।
सिलबन्दी बोलपत्र कात्तिक १८ गते (नोभेम्बर ४, २०२५) दिउँसो १२ बजेभित्र संघको मुलपानीस्थित कार्यालयमा बुझाउनुपर्नेछ ।
बोलपत्रहरू सोही दिन दिउँसो २ बजे संघको कार्यालयमा बोलकर्ता प्रतिनिधिहरूको उपस्थितिमा खोलिनेछन् । बोलपत्रको वैधता ९० दिन रहनेछ र न्यूनतम एनआरएस ९ लाख बराबरको जमानत पेश गर्नुपर्नेछ, जुन बोलपत्रको वैधता अवधि समाप्त भएको मितिबाट ३० दिनसम्म मान्य हुनुपर्नेछ ।
एनपीएलको पहिलो सिजन प्रतिस्पर्धाबिना भारतको कम्पनीलाई दिँदा विवादमा परेपछि क्यानले यसवर्ष बोलपत्र आह्वान गरेको हो । गतवर्ष क्यानले ब्रान्ड लजिक र भारतको कम्पनी टीसीएम स्पोर्टसलाई लाइभ फिड उत्पादन र प्रसारणको जिम्मा दिएको थियो ।
