आईसीटी समाचार
अनलाईन बाल सुरक्षाको लागि कार्यरत अग्रणी संस्था चाइल्डसेफनेटले मलेसियाली संस्था टेक्निज्मसंगको सहकार्यमा मलेसियामा अनलाईन बाल सुरक्षा कार्यक्रम सुरु गरेको छ । यस कार्यक्रम अन्तर्गत मलेसियाका ५०० स्कूलहरुमा साईबर सुरक्षाबारे तालिम संचालन गरिने छ ।
चाईल्डसेफनेटद्वारा प्रशिक्षित स्थानीय प्रशिक्षकहरुले चाईल्डसेफनेटका सामग्री प्रयोग गरि मलेसियामा देशव्यापी साइबर सुरक्षा तालिम संचालन गरिने यस कार्यक्रमबाट ८० हजारभन्दा बढी प्राथमिक तथा माध्यमिक तहका बालबालिका प्रत्यक्ष रूपमा लाभान्वित हुने छन् । उनीहरुले सुरक्षित रूपमा ईन्टरनेट प्रयोग गर्न र अनलाईन यौन शोषणबाट सुरक्षित रहन सिक्ने छन् ।
चाईल्डसेफनेटका संस्थापक तथा अध्यक्ष अनिल रघुवंशीका अनुसार संस्थाले नेपालका चालिसभन्दा बढी जिल्लामा साईबर सुरक्षाबारे तालिम संचालन गरिसकेको छ र यस वर्ष देखिँ नेपाल बाहिर पनि कार्यक्रम सुरु गरेको छ ।
चाइल्डसेफनेटले मलेसियाको साईबरजाया सहरमा तीनदिने प्रशिक्षक प्रशिक्षण सञ्चालन गरिसकेको छ, जसले प्रशिक्षकहरूलाई प्रभावकारी रुपमा साइबर सुरक्षाबारे तालिम र सचेतना कार्यक्रम सञ्चालन गर्न आवश्यक ज्ञान र शीप प्रदान गरेको छ ।
यसका साथै, दुबै संस्थाले मलेसियाका बालबालिकाहरूको आवश्यकताअनुसार विशेष साइबर सुरक्षा सचेतना सामग्रीहरू संयुक्त रूपमा विकास गरेका छन् । यसै क्रममा चाईल्डसेफनेटले बालबालिकाको अनलाइन सुरक्षासम्बन्धी एक पुस्तक तयार पारेको छ ।
मले र तमिल भाषामा उपलब्ध हुने यस पुस्तक प्रथम चरणमा ८० हजार प्रति प्रकाशन हुने र मलेसियाभरि वितरण गरिनेछ, जसले बालबालिकाहरू, अभिभावकहरू, र शिक्षकहरूलाई सुरक्षित रूपमा डिजिटल प्रविधि प्रयोग गर्न मद्दत गर्नेछ।
टेक्निज्मका प्रबन्ध निर्देशक डा. कविथाले चाइल्डसेफनेटसँगको सहकार्यले बालबालिकालाई अनलाइन सुरक्षा सम्बन्धी ज्ञान र सीप प्रदान गर्ने बताए । यो साझेदारी एक महत्वपूर्ण कोसेढुंगा भएको बताउँदै उनले मलेसियाबाट अन्य एशियाली देशहरूमा विस्तारको प्रयास गर्ने जानकारी दिए ।
यस्तै चाइल्डसेफनेटका संस्थापक तथा अध्यक्ष अनिल रघुवंशीले चाइल्डसेफनेट र टेक्निज्मबीचको सहकार्यले मलेसियाका बालबालिकालाई प्रविधिमार्फत गरिने अनलाइन हिंसा, जस्तै अनलाइन यौन दुर्व्यवहार, घृणास्पद सन्देश, गलत र भ्रामक सूचना र वयस्क सामग्रीको जोखिमबाट जोगाउन मद्दत गर्नेछ बताए ।
प्रविधि र स्रोतहरूको संयोजन गर्दै, टेक्निज्म र चाइल्डसेफनेटले साइबर सुरक्षा शिक्षामा नयाँ मानक स्थापित गरिरहेका छन्, जसले डिजिटल विश्वका चुनौतीहरूको सामना गर्न बालबालिकालाई तयार पार्नेछ । यो पहल दुबै संस्थाको बाल संरक्षण, शिक्षा, र डिजिटल साक्षरताप्रति प्रतिबद्धतालाई प्रतिबिम्बित गर्ने बताइएको छ ।
बालबालिकाहरूलाई साइबर दुर्व्यवहार, अनलाइन दुर्व्यवहारकर्ता (predators), डिजिटल ठगीजस्ता साइबर खतराहरू चिन्न र तिनको सामना गर्न सक्ने क्षमता विकास गराउने, बालबालिकामा आलोचनात्मक सोच कौशल विकसित गरी अनलाइन सुरक्षाको प्रवर्द्धन गर्ने, बालबालिकालाई डिजिटल यात्रा मार्गदर्शन गर्नका लागि आवश्यक स्रोत सामग्री र तालिम प्रदान गर्ने र बालबालिकामा जिम्मेवार रुपमा इन्टरनेट प्रयोग गर्ने संस्कार विकास गर्ने सहकार्यको उद्देश्य रहेको छ ।
