आईसीटी समाचार
चीनियाँ एआई स्टार्टअप ‘डीपसिक’ यतिबेला विश्वभर चर्चा भइरहेको छ । एआईको क्षेत्रमा वर्चस्व रहेको अमेरिकालाई चीनियाँ स्टार्टअप डीफसिकले ठूलो चुनौती दिएको छ ।
गत जनवरी २० मा डीपसिकले ‘डीपसिक आर वान’ मोडल सार्वजनिक गरेपछि अहिले विश्वभर चर्चा चुलिएको छ । विशेष गरी अमेरिकाले यसलाई चुनौतीको रूपमा हेरेको छ ।
डीपसिकको यस पूर्ण ओपन सोर्स मोडलले ओपन एआईको मोडेल जस्तै काम गर्ने दावी गरिएको छ । डीपसिकले कम लागत र उच्च-गुणस्तरका थोरै चिप्सहरू प्रयोग गरेर प्रतिस्पर्धात्मक च्याटबोट निर्माण गरेको छ । अमेरिकाले चीप निर्यातमा लगाएको प्रतिबन्धका बाबजुद सिलिकभ भ्यालीलाई टक्कर दिने गरी एआई मोडेल बनाएको प्रति अहिले विश्वभर प्रशंसा भइरहेको छ ।
उन्नत चीपहरू निर्यात नगरेर चीनको एआई प्रगतिलाई सुस्त पार्ने अमेरिकाको योजना थियो । तर त्यसले इन्नोभेसनलाई नै बढावा दिएको छ । यसले पनि चीन एआईको दौडमा पछाडि नरहेको स्पष्ट सन्देश दिइसकेको छ । ओपन सोर्समा आधारित भएकाले चीनले एआईको क्षेत्रमा आफ्नो प्रभुत्व अझै फैलाउन सक्छ ।
डिपसिकको आर वान मोडेलले ओपन एआको उत्कृष्ट रिजनिङ मोडेल जस्तै गणित, कोडिङ र कम्प्लेक्स रिजनिङ लगायतका काम गर्न सक्छ ।
उदाहरणको लागि एआईएमई २०२४ गणित बेन्चमार्कमा डिपसिक आरवानले ७९.८ प्रतिशत र ओपन एआईको जिरो वानले ७९.२ प्रतिशत अंक प्राप्त गरेको छ ।
म्याथ ५०० बेन्चमार्कमा डिपसिकले ९७.३ प्रतिशत र जिरोवाले ९६.४ प्रतिशत प्राप्त गरेको छ । कोडिङमा आरवानले ९६.३ प्रतिशत र जिरोवानले ९६.६ प्रतिशत प्राप्त गरेको छ ।
यी बेन्चमार्कहरू अपूर्ण हुन सक्ने भएपनि डिपसिक ओपन एआईसँग तुलना गर्न लायक भइसकेको छ । डिपसिकले कम्प्युटर चिप्समा भर पर्नुको सट्टा इन्नोभेसनमार्फत यो उपलब्धि हासिल गर्न सक्षम भएको हो ।
