आईसीटी समाचार
चितवनका युवा उद्यमी दिक्षान्त पाण्डेको कम्पनी टेक गुर्खा (Tech Gurkha) ले अन्तर्राष्ट्रिय स्तरमा सफलता पाएको छ। उनको ए.आई. प्लेटफर्म 'गफजीपिटी' (GuffGPT) को विकास र विस्तारका लागि विश्वकै अग्रणी प्रविधि कम्पनी माइक्रोसफ्टले १ लाख ५० हजार अमेरिकी डलर (करिब २ करोड नेपाली रुपैयाँ) बराबरको 'क्लाउड क्रेडिट' प्रदान गरेको छ। माइक्रोसफ्टको 'स्टार्टअप फाउन्डर्स हब' कार्यक्रम अन्तर्गत प्राप्त यो सहयोगले टेक गुर्खालाई माइक्रोसफ्टको महँगो 'Azure' क्लाउड सर्भर, ए.आई. टुल्स र अन्य अत्याधुनिक सफ्टवेयर सुविधाहरू निःशुल्क प्रयोग गर्ने बाटो खोलेको छ। ए.आई. को क्षेत्रमा काम गर्ने स्टार्टअपहरूका लागि सर्भर खर्च र कम्प्युटिङ पावर सबैभन्दा ठूलो चुनौती हुने गर्दछ, जुन अब यो सहयोगले सहज बनाउनेछ।
विश्वभरका हजारौँ स्टार्टअपहरूमध्ये उत्कृष्ट १ प्रतिशत मा परेर टेक गुर्खाले यो ठूलो स्केलको क्रेडिट सुविधा प्राप्त गरेको हो। यसअघि पनि यो कम्पनीले माइक्रोसफ्टबाट २५ हजार डलर बराबरको यस्तै सहयोग पाइसकेको थियो। यस सफलताका बारेमा दिक्षान्त पाण्डे भन्छन्, "माइक्रोसफ्टको यो सहयोगले हामीलाई महँगो सर्भरको चिन्ता नगरी हाम्रा ए.आई. मोडलहरूलाई अझ शक्तिशाली र विश्वस्तरीय बनाउन सघाउनेछ। हाम्रो लक्ष्य नेपालमा बनेको प्रविधिलाई विश्व बजारमा प्रतिस्पर्धी बनाउनु हो।"
दिक्षान्तको यो सफलताको यात्रा पुरानै हो। यसअघि उनले निर्माण गरेको 'गफजीपिटी' परियोजनाले सन् २०२४ मा दुबईमा आयोजित विश्वकै ठूलो ए.आई. र कोडिङ प्रतियोगिता 'Codeavour 5.0' मा प्रतिष्ठित 'Livelihood and Sustainability Award' जितेर नेपालको नाम उच्च राखेको थियो। प्रविधि क्षेत्रमा उनको यही दख्खल र योगदानलाई कदर गर्दै उनलाई हालै 'Codeavour 7.0' को लागि नेपालको आधिकारिक एम्बास्डर समेत नियुक्त गरिएको छ। उनले अब नेपालमा युवाहरूलाई कोडिङ र नवीन प्रविधिमा जोड्न नेतृत्वदायी भूमिका खेल्नेछन्। आफ्नो कामलाई विश्वव्यापी विस्तार गर्न पाण्डेले हालै अमेरिकामा 'Tech Gurkha LLC' समेत दर्ता गरिसकेका छन्। सानै उमेरमा प्राविधिक क्षमतामार्फत विश्वका ठूला कम्पनीहरूको ध्यान खिच्न सफल दिक्षान्तको यो प्रगति नेपालका अन्य युवा उद्यमीहरूका लागि ठूलो प्रेरणा बनेको छ।
