स्नेहा झा
इन्ड्राइभ हाल नेपालमा सबैभन्दा लोकप्रिय राइड–हेलिङ सेवाहरू मध्ये एक हो । यसको मुख्य कारण भनेको सवारी चालक र ग्राहक दुवैले बार्गेनिङ गर्न सक्छन् ।
हालै मात्र कम्पनीले नेपालमा कुरियर सेवा समेत सार्वजनिक गरेको छ । यही अवसरमा एशिया प्रशान्त क्षेत्रकी मार्केटिङ निर्देशक नतालिया माकारेन्को नेपाल आएकी थिइन् ।
यसै सन्दर्भमा माकारेन्कोसँग आईसीटी समाचारले कुराकानी गरेको छ । कुराकानीको सम्पादित अंश यस्तो छ
विशेषगरी नेपालका लागि इन्ड्राइभको दीर्घकालीन लक्ष्यहरू के के छन् ?
हामी एक ग्लोबल कम्पनी हौं । अहिले ४७ देशहरूमा सञ्चालन गरिरहेका छौं र अझै थप देशहरुमा विस्तर गर्ने प्रयासमा छौं । नेपाल एशिया प्यासिफिकका प्रमुख देशहरू मध्ये एक हो । एपीएसीमा ११ देशहरू समावेश छन् ।
इन्ड्राइभको व्यवसाय राम्रो चलिरहेको छ । यसलाई स्थिर राख्न चाहेका छौं । ग्राहकको आवश्यकता पूरा गर्न र विश्वसनीयतालाई बढावा दिन विभिन्न परियोजना समेत ल्याउँदै छ, जसले नेपालीहरूको जीवनलाई सुधार गर्न मद्दत गर्नेछ । यो हाम्रो इनभिजन प्रोग्रामको एक अशं हो र यस अन्तरगत ११ परियोजनाहरू छन् ।
अन्य राइड हेलिंग सेवाको तुलनामा इन्ड्राइभ नेपाली बजारमा सफल हुनुको कारण के हो ?
इन्ड्राइभको मुख्य सफलताको कारण भनेको यसको कोर भ्यालु प्रपोजिशन हो । हामी निष्पक्ष समाज विकासमा योगदान पुर्याउन चाहन्छौँ । यात्रु र चालक दुवैले मोबिलिटी सेवाहरूमा आफुले चाहेको मूल्यमा यात्रा गर्न सकून् भन्ने हाम्रो उद्देश्य हो । यो ग्राहक र चालक दुवैका लागि हित छ । अन्य प्लेटफर्म भन्दा हामी यहाँ फरक छौं ।
इन्ड्राइभ विश्वमै एउटा सफल कम्पनी हो । यदि तपाइँले डेटा हेर्नुभयो भने हामीले केवल ११ वर्ष पहिले कम्पनी सुरु गरेका थियौं र अहिले हामी विश्वभर हाम्रो एपको डाउनलोडको सन्दर्भमा दोस्रो स्थानमा आउँछौं ।
हाम्रो अगाडी केवल उबर रहेको छ, जुन हालको बजारको शीर्ष स्थानमा पर्छ । हामीले व्यवसाय मात्र नगरेर मानिसको जीवनलाई नै सहज बनाएका छौं ।
एपभित्र हामीले अन्य सेवाहरू पनि थप गर्दै छौं । हालै इन्ड्राइभ मनी मेक्सिकोमा सुरु गरेका छौं । यो एक फिनटेक सेवा हो र हामी विश्वभरि विस्तार गर्ने लक्ष्य राखिरहेका छौं । यात्रु र चालकहरूलाई आवश्यकतालाई मध्यनजर गर्दै सेवा विविधतामा जोड दिएका छौं ।
इन्ड्राइभले हालै चालकहरुका लागि सुरु गरेको काउन्सिलिंग सेन्टर के हो ?
काउन्डिलिङ सेन्टर भनेको चलाकहरूको कम्पनीसँग संवाद गर्ने एउटा माध्यम हो । इन्ड्राइभमा आवद्ध हुन भएपछि चालकहरूलाई सेवा, शर्त, नियमहरूको बारेमा जानकारी दिन्छौं । काउन्सिलिंग सेन्टरलाई धेरैको पहुँचमा पुर्याउने हाम्रो योजना छ ।
नेपालमा दर्ता भएपश्चात कम्पनीले दश प्रतिशत कमिसन लिन थालेको छ । यसले राइडरको शंख्यामा कुनै घटबढ भएको छ ?
हाम्रो व्यावसायिक सञ्चालनमा यसको प्रभाव परेको छैन् । १० प्रतिशत भन्दा पनि ठ्याक्कै भन्नुपर्दा ९.९९ प्रतिशत कमिशन लिने गरेका छौं । यात्रु र चालक दुवैलाई मार नपर्ने गरी हामीले कमिसन लिएका छौं ।
सेवा सुधारमा प्रयोगकर्ताको प्रतिक्रियालाई कत्तिको महत्त्व दिनुभएको छ ?
हामी यसलाई नियमित रूपमा ध्यान दिई रहेका हुन्छौं । यात्रु र चालकहरूसँग विभिन्न माध्यमबाट सम्पर्कमै हुन्छौं । दैनिक रूपमा प्रतिक्रिया संकलन गरिरहेका छौं । म आफैंले महिनामा एक पटक अपरेसन कलहरू गर्दै आएकी छु ।
हामी ग्राहकका प्रतिक्रियाहरू लिन्छौं, एकत्रित गर्छौं र कसरी हाम्रो सेवाहरू सुधार गर्ने, सेवाहरू वा एप्लिकेसनलाई परिवर्तन गर्ने, मार्केटिङ अभियान वा जुनसुकै व्यवसायिक पक्षलाई सुधार गर्ने भन्ने बारेमा सोच्छौ।
यो कम्पनीको लागि एक सामान्य अपरेशनल तरिका हो । सबै कुराको केन्द्रमा प्रतिक्रियालाई राख्ने गरेका छौं ।
नेपालका लागि इन्ड्राइभको आगामी योजना के कस्ता छन् ?
नेपालका लागि हामीसँग ३६० मार्केटिङ अभियान योजना छ । सन् २०३० सम्म १ अर्ब मानिसहरूलाई प्रभाव पार्ने योजना छ । हालै काठमाडौंमा कुरियर सेवा सुरु गरेका छौं । हामीले अन्तर–शहर कार्गो सेवाहरू पनि सुरु गरेका छौं ।
सबैभन्दा महत्त्वपूर्ण कुरा भनेको हाम्रो इनभिजन परियोजना हो । किनकी यसले मानिसहरूलाई एकअर्कासँग जोड्न मद्दत पुर्याउँछ । यसले मानिसहरूको जीवनका विभिन्न पक्षहरूमा जोड्न मद्दत पुर्याउँछ, चाहे त्यो कला होस्, खेलकुद होस्, टेक्नोलोजी होस् वा बालबालिकाको शिक्षा नै ।
