सार्वजनिक वाइफाइको खतरा: ह्याकरबाट डेटा चोरी र बैंकिङ ठगीको उच्च जोखिम

ह्याकरहरूले प्राय: वास्तविक नेटवर्कको नामसँग मिल्दोजुल्दो नक्कली वाइ-फाइ बनाउँछन्। मानिसहरू एयरपोर्टको फ्री वाइफाइ भनेर त्यसमा कनेक्ट गर्दा, उनीहरूको फोन र इन्टरनेटबीच एक डिजिटल बिचौलिया बसेझैँ हुन्छ। त्यसपछि फोनमा टाइप गरिएको पासवर्ड वा बैंकिङ पिन सिधै ह्याकरको सर्भरमा पुग्न सक्छ। साइबर विशेषज्ञहरूका अनुसार सार्वजनिक वाइफाइ नेटवर्कहरू ह्याकिङका लागि सबैभन्दा सजिला लक्ष्य हुन्।

यो खतरा केवल डाटासम्म सीमित छैन। ह्याकरहरूले तपाईंको डिभाइसमा खतरनाक सफ्टवेयर हाल्न सक्छन्। त्यसपछि तपाईंको फोनको क्यामरा र माइक्रोफोन अनुमति बिना चल्न सक्छन् र तपाईंको वास्तविक समयको स्थान ट्र्याक हुन सक्छ। निजी तस्वीर र भिडियोहरू डार्क वेबमा बिक्री हुने सम्भावना पनि रहन्छ।

प्रविधि विशेषज्ञहरू भन्छन् कि सार्वजनिक वाइफाइ प्रयोग गरेर युपिआइ ट्रान्जेक्शन वा मोबाइल बैंकिङ गर्दा डाटा सुरक्षा कमजोर हुन सक्छ। यस्तो अवस्थामा ट्रान्जेक्शन बीचमै नियन्त्रणमा लिन सकिन्छ र पैसा ह्याकरतर्फ जान सक्छ।

यदि बाध्य भएर सार्वजनिक वाइफाइ प्रयोग गर्नुपरेमा केही उपाय अपनाउन सकिन्छ। प्रयोग गर्नु अघि भरपर्दो भिएपीएन प्रयोग गर्नुहोस्, जसले डाटालाई इन्क्रिप्ट गर्छ। फोनको अटो-कनेक्ट सुविधा बन्द गर्नुहोस् र सार्वजनिक नेटवर्कमा बैंकिङ, किनमेल वा इमेल लगइन नगर्नुहोस्। https:// बाट सुरु हुने र लक आइकन भएको वेबसाइट मात्र प्रयोग गर्नुहोस्। साथै सबै सामाजिक सञ्जाल र बैंक खातामा दुई-चरण प्रमाणीकरण अन गरेर राख्नुहोस्, जसले पासवर्ड थाहा भए पनि ह्याकरले लगइन गर्न नपाओस्।