आईसीटी समाचार
नेपाल टेलिकमका प्रिपेड तथा पोष्टपेड मोबाइल रिचार्ज गर्नका लागि रिचार्ज कार्डको अतिरिक्त अन्य विभिन्न वैकल्पिक उपायहरु अपनाउन सकिन्छ ।
यसका लागि विभिन्न दरका रिचार्ज कार्डका साथै मोबाइल पोइन्ट अफ सेल (एमपोस), नमस्ते पे, इसेवा, खल्ती, आईएमई पे लगायतका डिजिटल वालेटहरु विकल्पको रुपमा रहेका छन् ।
यसै सन्दर्भमा कम्पनीले मङ्सिर १८ गतेदेखि आगामी पुस १७ गतेसम्मका लागि एमपोस रिचार्जमा बोनस उपलब्ध गराउने जनाएको छ ।
एमपीओएस रिचार्ज गर्दा ग्राहकले ५० देखि ९९ सयसम्मको रिचार्जमा तीन दिनका लागि २० मिनेट अन नेट भ्वाइस सुविधा प्राप्त गर्नेछन् भने एक सयदेखि एकसय ९९ सम्मको रिचार्जमा ५० मिनेट, दुई सयदेखि ४ सय ९९ सम्मको रिचार्जमा दुई दिनका लागि दुई जीबी डेटा र पाँचसयदेखि माथिको रिचार्जमा चार दिनका लागि ८ जीबी डेटा प्राप्त गर्न सक्ने टेलिकमले जनाएको छ।
ग्राहकवर्गले सहजरुपमा कम्पनीका सेवाहरु मार्फत परिवारजन तथा मित्रवर्गसँग सञ्चार सम्पर्कमा रहिरहन सहज होस् भन्ने उद्देश्यले विभिन्न विद्युतीय माध्यमबाट टपअप गर्न सकिने व्यवस्था कम्पनीले गरेको छ ।
यसका साथै सहज तवरले अविछिन्न रुपमा सञ्चार सेवा उपभोग गर्न ब्यालेन्स सकिएको अवस्थामा समेत प्रिपेड मोबाइल प्रयोगकर्ताहरुको लागि नमस्ते सापटीको सुबिधा कम्पनीले उपलब्ध गराएको छ । प्रिपेड मोबाइल प्रयोगकर्ताहले Start टाइप गरी १४७७ मा सन्देश पठाएर अथवा *1477# डायल गरी 1 छनौट गरेर सापटी लिन सक्नेछन् ।
