आईसीटी समाचार
नेपाल दूरसञ्चार प्राधिकरणकी उपनिर्देशक रोजा किरण बासुकलाले राष्ट्रिय नारी सम्मान २०८१ प्राप्त गरेकी छन् । दूरसञ्चार क्षेत्रमा योगदान पुर्याए वापत चन्द्रलोक प्रतिष्ठानले बासुकलालाई राष्ट्रिय नारी सम्मान २०८१ प्रदान गरेको हो ।
बासुकला विगत १५ वर्षदेखि नेपालको सूचना तथा सञ्चार प्रविधिको क्षेत्रमा सक्रिय छिन् । इन्जिनियरिङ अध्ययन संस्थान पुलचोकबाट कम्प्युटर इन्जिनियरिङ विषयमा स्नातक र दक्षिण कोरियाको इन्टिच्युट अफ इन्फर्मेसन टेक्नोलोजीज एडभान्समेन्टबाट छात्रवृत्तिमा इन्फर्मेसन एण्ड कम्युनिकेसनमा इन्जिनियरिङमा स्नातकोत्तर गरेकी छन् ।
यस्तै त्रिभुवन विश्वविद्यालयबाट एलएलबी डिग्री र जन प्रशासनमा स्नातकोत्तर डिग्री हासिल गरेकी छन् । सूचना प्रविधिमा महिलाहरूको सहभागीता बढाउन र पहुँच अभिवृद्धि गर्न विभिन्न काम गर्दै आएकी रोजाको नेपालमा फोरजी सेवाहरूको लागि रेडियो फ्रिक्वेन्सी स्पेक्ट्रम व्यवस्थापनमा योगदान रहेको छ ।
सन् २०२२ मा उनलाई सञ्चार तथा सूचना प्रविधि मन्त्रालयले महिला तर्फको नेशनल आइसिटी अवार्डबाट समेत सम्मान गरेको थियो ।
