आईसीटी समाचार
अमेरिकाको नर्थवेस्टर्न विश्वविद्यालयका इन्जिनियरहरूले विश्वकै सबैभन्दा सानो पेसमेकर विकास गरेका छन् । यो पेसमेकर यति सानो छ कि जुन सिरिन्जको टुप्पोभित्र अटाउँछ ।
यसको मतलब, यो पेसमेकर सजिलै इन्जेक्सनमार्फत शरीरमा राख्न सकिन्छ, जसले गर्दा बिरामीहरूलाई अपरेशनको पीडा भोग्नु नपर्न सक्छ ।
यो पेसमेकर सुरक्षित रूपमा रक्तप्रवाहमा घुलिन्छ, त्यसैले यो स्थायी नभई अस्थायी समाधान हो । यो खासगरी ती बिरामीहरूका लागि डिजाइन गरिएको हो, जसलाई अल्पकालीन रूपमा मुटुको सहायताको आवश्यकता पर्छ – जस्तै जन्मजात मुटु दोष भएका नवजात शिशुहरू ।
तर यो कुनै पनि उमेर वा मुटुको आकारसँग मिल्न सक्छ । यो पेसमेकर प्रकाशबाट सञ्चालित हुन्छ, जुन साँच्चै नै रोमाञ्चक कुरा हो । यो एउटा वायरलेस पहिरनयोग्य डिभाइससँग जोडिन्छ जुन बिरामीको छातीमा राखिन्छ । यो डिभाइसले मुटुको अनियमित धड्कन महसुस गरेपछि प्रकाश झल्किने छ, जसले पेसमेकरलाई सक्रिय गर्नेछ । यो प्रकाश छाला, हड्डी र मांसपेशीभित्रसम्म पुग्न सक्छ ।
यद्यपि यो पेसमेकर केवल एक मिलिमिटर बाक्लो छ, यसले पूर्ण आकारको पेसमेकरजत्तिकै शक्तिशाली रूपमा काम गर्न सक्छ । यो प्रविधिले मानव र जनावर दुवैको मुटुमा सफल परीक्षण पार गरिसकेको इन्जिनियरहरूको भनाइ छ । उनीहरूका अनुसार यसको मुख्य उद्देश्य बालबालिकाको उपचारमा हो ।
नर्थवेस्टर्नका प्रयोगात्मक मुटरोग तथा यस अध्ययनको सह-नेतृत्वकर्ता डाक्टर इगोर एफिमोभले प्रत्येक सयजना बच्चामध्ये करिब एकजनामा जन्मजात मुटु समस्या हुने बताए । उनले अगाडि भने, ‘अपरेशनपछि मात्र केही दिनको लागि पेसिंग आवश्यक हुन्छ । अब हामीले सानो पेसमेकर राखेर बिना थप सर्जरी सजिलै उपचार गर्न सक्नेछौं।’
यो डिभाइस विकासको सह-नेतृत्वमा जोन रोजर्स पनि थिए, जो जैविक प्रविधिको क्षेत्रमा प्रसिद्ध नाम हो । उनले यसअघि इनभिजिबिलिटी क्लोक, स्वास्थ्य ट्र्याक गर्ने ट्याटु, र शरीरमै घुल्ने सर्किट जस्ता अद्भुत आविष्कारहरू गरेका छन् ।
भविष्यमा धेरै पेसमेकरहरू एकसाथ इन्जेक्ट गरेर मुटुको विभिन्न भागहरूलाई अलग–अलग तरिकाले सिंक्रोनाइज गर्न सकिने उनको सोच छ ।
यसले मुटुको धड्कन सुधार्न, दुखाइ रोक्न र घाउ भरिन समेत सहयोग गर्न सक्ने समेत उनको भनाइ छ । यो प्रविधि केवल पेसिंगको लागि नभई पुरै चिकित्सा क्षेत्रको भविष्यलाई बदल्न सक्ने सामर्थ्य राख्ने छ ।
