आईसीटी समाचार
आईसिटी फाउण्डेशन नेपाल र एनसेल फाउण्डेशनको संयुक्त पहलमा सञ्चालन भएको ‘आईसिटी ज्ञान’ कार्यक्रम अन्तर्गत मोरङ, ऊरलाबारी–६ स्थित श्री राधिका माध्यमिक विद्यालयमा बिहीबार एक सफल व्यावहारिक तालिम सम्पन्न भएको छ।
यस तालिममा करिब २०० जना विद्यार्थी तथा शिक्षकले सहभागिता जनाएका थिए । सहभागीहरूको उमेर समूह प्रायः १४–२२ वर्ष पर्ने भएकाले उनीहरूलाई लक्षित गरी साइबर सुरक्षा, सुरक्षित इन्टरनेट प्रयोग, डिजिटल सेवा, ई–गभर्नेन्स, क्यारियर मार्गदर्शन, सीप विकास, कृत्रिम बौद्धिकता (एआई) र अन्य उदीयमान प्रविधिहरूसम्बन्धी विविध सत्रहरू सञ्चालन गरिएको थियो ।
तालिममा सहभागीहरूले अनलाइन व्यवहारका जोखिम र साइबर अपराधबाट जोगिने उपाय सिकेका थिए भने, सरकारी तथा निजी अनलाइन सेवाहरू कसरी प्रयोग गर्ने र इ–गभर्नेन्स पोर्टलमार्फत आवश्यक सेवा प्राप्त गर्ने बारे पनि जानकारी प्रदान गरिएको थियो । त्यस्तै, सूचना–प्रविधि क्षेत्रमा सम्भावित करियर अवसरहरू, आवश्यक दक्षता र व्यावसायिक सीप विकास सम्बन्धी व्यावहारिक कार्यशाला सञ्चालन गरिएको थियो । कार्यक्रममा आधुनिक युगका नयाँ प्रविधि, विशेषगरी एआईका आधारभूत अवधारणाहरू र त्यसका प्रयोगका सम्भावनाहरूबारे जानकारीमूलक सत्रहरू पनि समावेश गरिएका थिए ।
कार्यक्रमको उद्घाटन समारोहमा आईसिटी फाउण्डेशन नेपालको अध्यक्ष राजन लम्सालले सम्बोधन गर्दै भने,
“डिजिटल विभेद अन्त्य गरी सूचना तथा सञ्चार प्रविधिमा सर्वसुलभ पहुँच सुनिश्चित गर्न समुदाय स्तरमा सञ्चालन गरिएका यी तालिमहरू महत्त्वपूर्ण साबित हुनेछन् । युवापुस्तालाई प्रविधिमा सशक्त बनाउँदा आगामी दिनमा दीगो सामाजिक–आर्थिक परिवर्तन सम्भव हुनेछ ।”
एनसेल फाउण्डेशनका परियोजना संयोजकले पनि कार्यक्रम सफल बनाउन गरेको सहयोगबारे धन्यवाद व्यक्त गर्दै भने,
“हाम्रो सामाजिक पहल अन्तर्गत डिजिटल पहुँचको दायरा फराकिलो बनाउन र सबै तहका नागरिकलाई अनलाइन प्लेटफर्ममार्फत सेवा लिन सहज बनाउन यो अभियान महत्वपूर्ण छ ।”
तालिम अवधिमा सहभागीहरूले अन्तरक्रिया सत्रमार्फत प्रश्न–उत्तर गरे, जहाँ विद्यार्र्थीहरुले मोबाइल बैंकिङ, अनलाइन भुक्तानी प्रणाली र सामाजिक सञ्जाल प्रयोगबारे चासो देखाएका थिए । शिक्षकहरूले पनि आफ्ना कक्षामा नयाँ प्रविधि समावेश गर्ने तरिका र डिजिटल शिक्षण–अध्यापनमा ध्यान दिनुपर्ने विषयमा सुझावहरू साझा गरेका थिए ।
उक्त कार्यक्रमले स्थानीय समुदायमा डिजिटल साक्षरता अभिवृद्धि गर्ने तथा भविष्यमा प्रत्येक नागरिकलाई प्रविधिमा पहुँचयोग्य बनाउने लक्ष्यमा ठोस योगदान पुर्याएको विश्वास व्यक्त गरिएको छ । आगामी दिनमा कोशी प्रदेशभित्र अन्य जिल्लाहरूमा पनि यस्तै किसिमका तालिमहरू निरन्तर सञ्चालन गरिने जनाइएको छ ।
