आईसीटी समाचार
नेपाल युवा उद्यमी मञ्च (एनवाईईएफ) काठमाडौंले सूचना प्रविधि, स्टार्टअप, उद्यमशीलता लगायतका क्षेत्रमा उल्लेखनीय काम गरेका महिलाहरूको सम्मानमा ‘सेलिब्रेटिङ ट्रेलब्लेजर्स’ कार्यक्रम आयोजना गरेको छ ।
अन्तर्राष्ट्रिय महिला दिवसको अवसरमा शिखर इन्स्योरेन्ससँगको सहकार्यमा एनवाईईएफ काठमाडौंले । महिलालाई प्रेरित गर्न र भएका प्रयासलाई एउटा प्लेटफर्म प्रदान गर्न सो कार्यक्रम आयोजना गरेको हो ।
कार्यक्रममा इमोसनल इन्टेलिजेन्स विषयमा डा. भावना श्रेष्ठ र महिलाको सम्पत्ति हकको विषयमा निदा दून मल्लले वर्कशप सञ्चालन गरेको थिइन ।
वर्कशपपछि काठमाडौं महानगरपालिकाकी उपमेयर सुनिता डंगोलले समाजमा योगदान पुर्याउने महिलालाई सम्मान गरेको थिइन ।
सम्मान हुनेमा पहिलो महिला बडिबिल्डर रजनी श्रेष्ठ, अग्निनियन्त्रक रति ढुंगाना, अपाङ्गता समावेशीकरण प्रवर्द्धन गर्ने उद्यमी गंगा छन्त्याल, सामाजिक परिवर्तनको वकालत गर्ने कलाकार रसना बज्राचार्य र उद्यमशीलता इकोसिस्टम इनेबलर जुना माथेमा रहेकी छन् ।
जोन्टा, वुमन इन आईटी, पार्थ स्टुडेन्ट भेन्चर, वुमन लिड नेपाल र म्यानेजमेन्ट एसोसिएसन नेपाल जस्ता महिला नेतृत्वका फोरमका प्रतिनिधिहरुको उपस्थितिले कार्यक्रमलाई अझ विशेष बनाइएको थियो ।
एनवाईईएफ काठमाडौंले पहिलो पटक विभिन्न क्षेत्रका महिलाहरूलाई एउटै प्लेटफर्ममा ल्याउन पहल गरेको अध्यक्ष प्रार्थना शाखःले बताइन ।
यस्ता खालका कार्यक्रमले महिलाको विकास र सशक्तिकरणका लागि अनुकूल सुरक्षित वातावरण स्थापना गर्ने उनको भनाइ छ ।
