आईसीटी समाचार
डिजिटल भुक्तानी सेवा प्रदायक इसेवा र निर्जीवन बीमा प्रदायक शिखर इन्स्योरेन्स कम्पनी लिमिटेडको सहकार्यमा नेपालीको स्वास्थ्य सुरक्षालाई लक्षित गर्दै नयाँ स्वास्थ्य बीमा योजना “सहारा हेल्थ इन्स्योरेन्स” सार्वजनिक गरिएको छ।
यस बीमा योजनाको मुख्य उद्देश्य देशभरका नागरिकहरूलाई सहज, भरपर्दो र डिजिटल माध्यमबाट स्वास्थ्य बीमा सेवा प्रदान गर्नु भएको बताइएको छ। यो योजना ५ वर्षदेखि ६५ वर्ष उमेर समूहका नागरिकहरूका लागि उपलब्ध हुनेछ।
सहारा हेल्थ इन्स्योरेन्स अन्तर्गत बीमितले अस्पताल भर्ना, आकस्मिक उपचार, शल्यक्रिया, औषधोपचार खर्च, ल्याब परीक्षण देखि दुर्घटना उपचारसम्मको सेवा सुविधा प्राप्त गर्न सक्नेछन्। यो बीमा योजना रु. २ लाख, ३ लाख र ६ लाख बीमांकका विकल्पहरूमा उपलब्ध छ, र यसको प्रारम्भिक प्रिमियम मात्र १ हजार ३९९ रूपैयाँबाट सुरु हुन्छ।
यस सहारा हेल्थ इन्स्योरेन्स अन्तर्गत नेपालभरिका मान्यता प्राप्त अस्पतालमा उपचार गराएर Cash Reimbursement गर्न सकिन्छ। त्यसैगरी, बीमित व्यक्तिले देशभरका शिखर इन्स्योरेन्सका २६ वटा नेटवर्क अस्पतालहरूमा क्यासलेस उपचार सुविधा पनि प्राप्त गर्न सक्नेछन्।
यसले आकस्मिक अवस्थाहरूमा आर्थिक तनाव बिना उपचार सम्भव बनाउँछ। साथै, यस योजनामा एक पटकको निःशुल्क टेलिहेल्थ सल्लाह सेवा पनि समावेश गरिएको छ। जसले बीमितलाई स्वास्थ्य सल्लाह लिन अझ सजिलो बनाउने इसेवाले जारी गरेको विज्ञप्तिमा उल्लेख छ ।
यस योजना ग्राहकले इसेवा एपमार्फत केही मिनेटमै यो बीमा खरिद गर्न सक्नेछन् । जुन प्रक्रिया सहज, छरितो र पूर्ण रूपमा डिजिटल हुनेछ। केही सरल चरणहरू पूरा गरेपछि बीमा पोलिसी तुरुन्तै एसएमएस र इमेलमार्फत प्राप्त हुने बताइएको छ ।
यसको शुभारम्भ अवसरमा बोल्दै इसेवाका प्रमुख कार्यकारी अधिकृत जगदीश खड्काले सहारा हेल्थ इन्स्योरेन्सको सुरुवात बीमा डिजिटलाइजेशनको दिशामा अर्को महत्वपूर्ण कोशेढुङ्गा भएको बताए ।
