एनसेलको शेयर खरिद बिक्रीका सम्बन्धमा गठन भएको छानबिन समितिको म्याद थप

दूरसञ्चार सेवा प्रदायक कम्पनी एनसेलको शेयर खरिद बिक्रीका सम्बन्धमा उच्चस्तरीय अध्ययन तथा छानविन समितिको कार्यावधि थप भएको छ । 

पुस २४ गते मंगलबार बसेको मन्त्रिपरिषद् बैठकले एनसेलको शेयर खरिद बिक्रीका सम्बन्धमा गठन भएको अध्ययन तथा छानविन समितिको म्याद माघ १५ गतेसम्म थप गर्ने निर्णय गरेको हो ।

 मन्त्रिपरिषद्को गत मंसिर २१ गते बसेको बैठकले एनसेनको शेयर खरिद बिक्रीको सम्बन्धमा प्रचलित नेपाल कानुनको परिपालनाको विषय, राजश्व र नेपालमा वैदेशिक लगानीमा पर्नसक्ने असरलगायतका विषय अध्ययन तथा छानविन गरी ३० दिनभित्र प्रतिवेदन पेश गर्न पूर्व महालेखा परीक्षक टंकमणि शर्मा दंगालको संयोजकत्वमा समिति गठन गरेको थियो ।