आईसीटी समाचार
मेटाले फेसबुकमा वास्तविक नाम प्रयोग गर्ने पुरानो नियमलाई केही हदसम्म लचिलो बनाउँदै अब फेसबुक ग्रुपका सदस्यहरूलाई ‘कस्टम निकनेम’ र ‘अवतार’ प्रयोग गरेर सहभागिता जनाउन दिने भएको छ।
अब ग्रुपका प्रयोगकर्ताहरूले आफ्नो वास्तविक नाम प्रयोग गर्नु नपरी निकनेमका साथ पोस्ट वा कमेन्ट गर्न सक्नेछन्। मेटाका अनुसार, निकनेम सेट गर्नका लागि प्रयोगकर्ताले पहिलेदेखि उपलब्ध ‘अनोनिमस पोस्ट’ तयार गर्ने विकल्पकै टगल प्रयोग गर्नुपर्छ। तर यो सुविधा प्रयोग गर्न ग्रुप एडमिनले निकनेम फिचर सक्रिय गरेको हुनुपर्छ।
कतिपय अवस्थामा एडमिनले प्रत्येक निकनेमलाई छुट्टै स्वीकृति दिनुपर्ने पनि हुन सक्छ। एकपटक सुविधा सक्षम भएपछि प्रयोगकर्ताले आफ्नो वास्तविक नाम र निकनेमबीच सजिलै स्विच गर्न सक्छन्। निकनेम भने मेटाका कम्युनिटी स्ट्यान्डर्ड र टर्म्स अफ सर्विसअनुसार हुनुपर्नेछ।
निकनेम सेट गर्दा प्रयोगकर्ताले क्युट जनावरहरूका चित्र—जसमध्ये धेरैजसो सनग्लास लगाएका मनपर्ने अवतार—छान्ने सुविधासमेत पाउनेछन्। फेसबुक ग्रुपहरू पछिल्ला वर्षहरूमा प्रयोगकर्ता पुनः आकर्षित गर्ने मेटाका प्रमुख क्षेत्रमध्ये एक मानिन्छन्।
२०२४ मा मेटाले ग्रुपमा सेयर हुने स्थानीय कार्यक्रमहरू हाइलाइट गर्ने नयाँ ट्याब ल्याएको थियो। हालै निजी ग्रुपलाई सार्वजनिकमा परिणत गरेर नयाँ सदस्य आकर्षित गर्न सहयोग गर्ने टुलसमेत थपिएको छ।
एक मात्र फिचरले फेसबुकलाई फेरि युवाहरूको पहिलो रोजाइ बनाउन नसके पनि, प्रयोगकर्तालाई स्वतन्त्र रूपमा ग्रुपहरू अन्वेषण गर्न र खुला रूपमा पोस्ट गर्न प्रोत्साहित गर्ने प्रयासका रूपमा यो ‘निकनेम फिचर’ महत्त्वपूर्ण मानिएको छ।
