स्नेहा झा
आजको तीव्र रूपमा परिवर्तन भइरहने प्रविधि संसारमा स्मार्टफोन हाम्रो जीवनको अभिन्न हिस्सा बनिसकेको छ । हरेक वर्ष नयाँ प्रविधि र डिजाइनसहित मोबाइल फोन बजारमा आउँछन्, र तिनैमध्ये एउटा ठूलो नवीनता हो फोल्डेबल स्मार्टफोन ।
सामसङ, ह्वावे, ओप्पो तथा अन्य ठूला कम्पनीहरूले फोल्डेबल फोनलाई क्रान्तिकारी कदम को रूपमा प्रस्तुत गरेका छन्, जसले परम्परागत स्मार्टफोनभन्दा अलग अनुभव दिने वाचा गर्छ । तर, प्रश्न उठ्छ— के यो वास्तवमै फाइदाजनक लगानी हो वा केवल मोबाइल कम्पनीहरूले ग्राहकहरूलाई आकर्षित गर्न र उच्च मूल्य असुल गर्न बनाइएको अफवाह मात्र हो? यस विषयमा विस्तृत रूपमा विचार गरौँ ।
फोल्डेबल स्मार्टफोनका फाइदाहरू
फोल्डेबल स्मार्टफोनको सबैभन्दा ठूलो आकर्षण यसको बहुप्रयोगिता हो ।
कम्प्याक्ट डिजाइनः यो एउटा सानो उपकरणको रूपमा सजिलै खल्तीमा राख्न सकिन्छ र आवश्यकता परेमा ट्याबलेट जस्तै ठूलो स्क्रिन अनुभव दिन्छ ।
मल्टीटास्किङः एकसाथ भिडियो हेर्न, नोट्स लिन, वा विभिन्न एप्स चलाउन सहज हुन्छ ।
मनोरञ्जनको लागि उपयुक्तः ठूलो स्क्रिन भएकोले गेमिङ र चलचित्र हेर्न रुचाउनेहरूका लागि उपयुक्त विकल्प हुनसक्छ ।
भविष्यको प्रविधि : कम्पनीहरूले दाबी गर्छन् कि फोल्डेबल फोन प्रविधिको भविष्य हो र यो उत्पादकता बढाउन मद्दत गर्छ ।
फोल्डेबल स्मार्टफोनका कमजोरीहरू
उच्च मूल्यः परम्परागत फ्ल्यागशिप फोनको तुलनामा यसको मूल्य धेरै महँगो हुन्छ । नेपालमा अधिकांश फोल्डेबल फोनको मूल्य १ लाख भारु भन्दा माथि हुन्छ, जुन धेरै ग्राहकहरूको बजेटभन्दा बाहिरको कुरा हो ।
कमजोर निर्माण सामग्रीः
यी फोनको स्क्रिन प्लास्टिक वा धेरै पातलो ग्लास बाट बनेको हुन्छ, जसले गर्दा सजिलै खरोंच लाग्न सक्छ । पटक–पटक मोड्दा स्क्रिनमा ड्यामेज हुने वा निशान बस्ने सम्भावना उच्च हुन्छ ।
बैट्री र क्यामेरा प्रदर्शन कमजोरः
यस्ता फोनको बैट्री लाइफ प्रायः औसत हुन्छ । उस्तै मूल्यका नन–फोल्डेबल फोनहरू प्रायः राम्रो क्यामेरा र टिकाउ बैट्री दिन्छन् ।
के फोल्डेबल स्मार्टफोन केवल टे्रन्ड मात्र हो?
मोबाइल कम्पनीहरूमा नयाँ प्रविधिहरूलाई बढी प्रचार गरेर ग्राहकलाई महँगा डिभाइस किन्न प्रेरित गर्ने प्रवृत्ति देखिन्छ । सुरुवाती मोडेलहरूमा धेरै समस्या देखिएका छन् ।
यद्यपि, कम्पनीहरूले यसलाई “भविष्यको प्रविधि“ भनेर प्रचार गर्छन्, जबकि यसको व्यावहारिक उपयोगिता सीमित छ ।
बिक्रीको तथ्यांक हेर्दा पनि यी फोनहरू अझै आम उपभोक्ताहरूको दैनिक आवश्यकताहरू पूरा गर्न सक्षम छैनन् ।
प्रायः मानिसहरू यसलाई स्टाटस सिम्बोल वा परीक्षणका रूपमा मात्र खरिद गर्छन्, न कि दैनिक प्रयोगका लागि ।
के तपाईं फोल्डेबल स्मार्टफोन किन्नुहुन्छ?
फोल्डेबल स्मार्टफोन किन्नु फाइदाजनक मात्र तब हुनसक्छ, यदि तपाईंलाईः
- ठूलो स्क्रिन र मल्टीटास्किङ चाहिएको छ ।
- तपाईं महँगो मोबाइलमा लगानी गर्न इच्छुक हुनुहुन्छ ।
तर, साधारण ग्राहकहरूका लागि, जसले टिकाउ, किफायती र बहुप्रयोगी मोबाइल चाहन्छन्, यो अझै पनि जोखिमपूर्ण विकल्प हुन सक्छ । प्रविधिका रूपमा यो प्रभावशाली छ, तर मोबाइल कम्पनीहरूले प्रचार गरिरहेका जति क्रान्तिकारी भने होइन् ।
त्यसैले, फोल्डेबल स्मार्टफोन किन्नु अघि तपाईंको आवश्यकता र बजेट विचार गर्नुहोस् । के यो भविष्य हो या केवल महँगो प्रयोग? यसको जवाफ समयले मात्र दिनेछ ।
