आईसीटी समाचार
फिनटेक प्लेटफर्म जुनो (पूल टेक्नोलोजीज प्रालि) मा ग्लोबल इक्विटी फन्डले रणनीतिक लगानी गरेको छ। ग्लोबल इक्विटी फन्डले व्यवस्थापन गरेको विशिष्टीकृत लगानी फन्ड नेपाल इम्प्याक्ट ग्रोथ इक्विटी फन्ड–I (NIGEF-I) मार्फत उक्त लगानी गरिएको हो।
‘बैंकिङ बियोण्ड बोडर्स’ अवधारणामा आधारित जुनोले विश्वव्यापी भुक्तानीलाई सरल, पहुँचयोग्य र किफायती बनाउने लक्ष्य राखेको छ। अन्तरदेशीय वित्तीय कारोबारका अवरोध हटाउँदै सबैका लागि पहुँचयोग्य र प्रभावकारी भुक्तानी माध्यम बनाउने उद्देश्यसहित उद्यमी बाल कृष्ण जोशीले जुनोको स्थापना गरेका हुन्।
जोशीका अनुसार जुनोले नयाँ युगको क्रस–बोर्डर बैंकिङ प्लेटफर्म निर्माण गरिरहेको छ, जसले विश्वभरका प्रयोगकर्तालाई सजिलो, सुरक्षित र समावेशी वित्तीय पहुँच उपलब्ध गराउनेछ।
ग्लोबल इक्विटी फन्डका अनुसार यो लगानीले नेपाललाई विश्व फिनटेक इकोसिस्टममा अगाडि ल्याउने तथा उदाउँदो र विकसित राष्ट्रबीचको वित्तीय पहुँचमा समानता ल्याउन मद्दत गर्ने अपेक्षा गरिएको छ।
फिनटेक कम्पनीमा ग्लोबल इक्विटी फण्डले गरेको यो दोस्रो लगानी हो । यसअघि कम्पनीले नेपालको अग्रणी भुक्तानी प्रणाली सञ्चालक फोनपेमा पनि लगानी गरिसकेको छ ।
