आईसीटी समाचार
काठमाडौं । गुगलले आफ्नो macOS का लागि उपलब्ध जेमिनी (Gemini) एपमा नयाँ एजेन्टिक एआई (Agentic AI) सहायक ‘जेमिनी स्पार्क (Gemini Spark)’ क्रमश: उपलब्ध गराउन थालेको छ । यो नयाँ फिचरले जेमिनीलाई प्रयोगकर्ताको सक्रिय डिजिटल सहायकका रूपमा काम गर्न सक्षम बनाउने कम्पनीले जनाएको छ ।
गुगलका अनुसार जेमिनी स्पार्कले फाइल व्यवस्थापन, विभिन्न कार्य स्वचालित रूपमा सम्पन्न गर्ने तथा प्रयोगकर्ताको तर्फबाट आवश्यक कामहरू गर्न सक्ने क्षमता प्रदान गर्छ । यसले दैनिक कार्यलाई सहज र छिटो बनाउन मद्दत गर्ने अपेक्षा गरिएको छ ।
नयाँ एआई सहायकले म्याक कम्प्युटरमा रहेका धेरै काम स्वत: गर्न सक्छ । उदाहरणका लागि, धेरै PDF फाइलहरू व्यवस्थित गर्ने, इनभ्वाइसका आधारमा स्प्रेडसिट तयार गर्ने, आवश्यक फाइल खोजेर इमेलमार्फत पठाउने लगायतका काम जेमिनी स्पार्कले गर्न सक्ने गुगलले जनाएको छ ।
कम्पनीका अनुसार जेमिनी स्पार्कले प्रयोगकर्ताले अनुमति दिएका फाइलहरूमा मात्र पहुँच पाउनेछ । साथै, यसलाई Google Docs, Google Keep तथा अन्य केही गुगल सेवासँग पनि एकीकृत (इन्टिग्रेट) गर्न सकिनेछ ।
हाल जेमिनी स्पार्क परीक्षण (Preview) चरणमा रहेको छ । यो सेवा अहिले अमेरिकामा रहेका १८ वर्ष वा सोभन्दा माथिका Google AI Ultra सदस्यहरूका लागि मात्र उपलब्ध गराइएको गुगलले जनाएको छ । कम्पनीले आगामी दिनमा यसलाई थप प्रयोगकर्ता र अन्य क्षेत्रहरूमा विस्तार गर्ने अपेक्षा गरिएको छ ।
