आईसीटी समाचार
सरकारले आफ्ना एप तथा पोर्टलहरूलाई अपाङ्गता भएका व्यक्ति र कम प्राविधिक ज्ञान भएका नागरिकले पनि सहजै प्रयोग गर्न सक्ने गरी अझ सरल र पहुँचयोग्य बनाउने भएको छ। कार्यसूचीको बुँदा ३० अनुसार यो काम आगामी १०० दिनभित्र सम्पन्न गर्ने लक्ष्य राखिएको छ।
यसअन्तर्गत सरकारी डिजिटल सेवाहरूको डिजाइन, प्रयोगमैत्री संरचना र नेभिगेसन प्रणालीलाई पुनरावलोकन गरी सबै प्रकारका प्रयोगकर्ताले बिना जटिलता सेवा लिन सक्ने वातावरण बनाइनेछ। विशेषगरी दृष्टिविहीन, सुन्ने क्षमता कमजोर भएका, शारीरिक अप्ठ्यारो भएका तथा प्रविधिमा कम अभ्यस्त नागरिकलाई ध्यानमा राखेर एपको इन्टरफेस सुधार गरिने बताइएको छ।
सरकारले डिजिटल सेवामा सबै नागरिकको समान पहुँच सुनिश्चित गर्ने उद्देश्यसहित यो पहल अघि सारेको हो। सेवाग्राहीलाई अनावश्यक झन्झट नहोस्, जानकारी सजिलै भेटियोस् र सेवा प्रवाहमा कुनै समूह पछाडि नपरोस् भन्ने लक्ष्यका साथ एप र पोर्टलहरूलाई समावेशी बनाइने छ। यसले सूचना प्रविधिको लाभ सबै तहका नागरिकसम्म पुर्याउन मद्दत गर्ने अपेक्षा गरिएको छ।
