आईसीटी समाचार
नेपालको फिनटेक क्षेत्रलाई थप सबल र प्रतिस्पर्धी बनाउने उद्देश्यका साथ सिटी वालेट प्रा. लि. (सिटीपे) र छिटो पैसा प्रा. लि. बिचको ऐतिहासिक मर्जर प्रक्रिया अन्तिम चरणमा पुगेको छ ।
दुई संस्थाबीचको यो एकतासँगै आगामी वैशाख २ गतेलाई 'प्रपोज्ड माइग्रेसन डेट' तय गरिएको छ, जसले नेपालको डिजिटल भुक्तानी प्रणालीमा नयाँ आयाम थप्ने विश्वास गरिएको छ।
यस मर्जर पश्चात् छिटो पैसाका सम्पूर्ण सेवाग्राहीहरू सिटीपेको अत्याधुनिक र फराकिलो डिजिटल इकोसिस्टममा समाहित हुनेछन् । विशेष गरी पठाओ लगायतका राइड–सेयरिङ प्लेटफर्ममा आबद्ध राइडर, क्याप्टेन र हिरोहरूका लागि यो मर्जर एउटा महत्वपूर्ण कोशेढुङ्गा सावित हुने देखिएको छ । अब राइडरहरूले विभिन्न वालेटहरू प्रयोग गर्नुपर्ने झन्झटबाट मुक्ति पाउँदै सिटीपे मार्फत 'अल-इन-वन' भुक्तानी समाधान प्राप्त गर्नेछन् ।
सिटीपेमा आबद्ध भएपछि राइडरहरूले पठाओको बक्यौता र जरिवाना सिधै एपबाट तुरुन्तै भुक्तानी गरी आफ्नो एकाउन्टलाई सधैँ सक्रिय राख्न सक्नेछन् । साथै, उनीहरूका लागि विशेष क्यासब्याक अफर र लोयल्टी रिवार्डहरूको समेत व्यवस्था गरिएको छ, जसले गर्दा समयको बचत हुनुका साथै दैनिक कारोबार अझ सहज र लाभदायी बन्नेछ ।
फिनटेक क्षेत्रमा आफ्नो बलियो उपस्थिति जनाउँदै आएको सिटीपेले नेपालभरका लाखौँ मर्चेन्टहरूमा फोनपे, नेपालपे र स्मार्ट क्यूआरमार्फत सहज भुक्तानीको सुविधा प्रदान गर्दै आएको छ । यसका साथै प्रयोगकर्ताहरूले घरमै बसी आन्तरिक तथा अन्तर्राष्ट्रिय हवाइ जहाज र बसको टिकट बुकिङ गर्न सक्नेछन् ।
नेपाल राष्ट्र बैंकबाट अनुमति प्राप्त यो वालेटले राजस्व, ट्राफिक फाइन र अन्य सरकारी करहरू सिधै भुक्तानी गर्ने सुविधा समेत प्रदान गर्दै आएको छ, जुन उच्च स्तरको इन्क्रिप्शन प्रविधिद्वारा सुरक्षित छ ।
मर्जरका सम्बन्धमा खुसी व्यक्त गर्दै सिटीपे वालेटका सीईओ विनय रेग्मीले छिटो पैसाका हरेक ग्राहक र विशेष गरी सडकमा पसिना बगाउने राइडर हिरोहरूलाई सिटीपेको परिवारमा स्वागत गर्न आफूहरू आतुर रहेको बताए ।
