आईसीटी समाचार
मोरू डिजिटल वालेटले हालै होटल तथा होलिडे बुकिङ सेवा सुरु गरेको छ । अब मोरू एपमार्फत प्रयोगकर्ताले सजिलै देशभरका होटल, रिसोर्ट, र होलिडे प्याकेज बुक गर्न सक्ने छन् ।
मोरूले यो सेवा विशेष गरी नेपालका लोकप्रिय पर्यटकीय गन्तव्यहरूलाई लक्षित गरी सुरु गरेको हो । प्रयोगकर्ताले अब पोखराको फेवाताल, चितवनको जंगल सफारी, लुम्बिनीको धार्मिक भ्रमण, र सगरमाथा बेस क्याम्पको ट्रेकिङजस्ता अनुभवहरूको योजना मोरू एपबाटै बनाउन सक्नेछन् ।
त्यसैगरी, मोरुले दशैं, तिहार, छठ र नयाँ वर्षजस्ता चाडपर्व तथा विवाह र विशेष कार्यक्रमहरूको बुकिङका लागि पनि विशेष अफर उपलब्ध गराएको छ। मोरुले ग्राहकलाई आकर्षित गर्नका लागि प्रारम्भिक समयमै विभिन्न छुट अफरहरू सार्वजनिक गरेको छ।
नेपालको पर्यटन क्षेत्रलाई प्रवर्द्धन गर्न र डिजिटल सेवाको पहुँचलाई अझै प्रभावकारी बनाउन होटल तथा होलिडे बुकिङ सेवा सुरु गरेको मोरूका बिजनेस म्यानेजर अनिश पौडेलले बताए ।
ग्राहकले मोरू एपमा गएर गन्तव्य, मिति, र बुक गर्न चाहेको सेवाको प्रकार छनोट गरेपछि तुरुन्तै बुकिङ प्रक्रिया पूरा गर्न सक्नेछन् । मोरुको यो सेवा प्रयोग गर्न सहज, सरल र सुरक्षित भएको पनि कम्पनीले बताएको छ ।
मोरुले यसअघि नै मोबाइल रिचार्ज, बिल पेमेन्ट, बैंक ट्रान्सफर, र अन्य विभिन्न सेवाहरू उपलब्ध गराउँदै आएको छ। अब होटल बुकिङको थपिएपछि मोरूले आफ्नो डिजिटल प्लेटफर्मलाई अझ बहुआयामिक बनाएको छ।
नेपालभरका पर्यटक, विशेष गरी आन्तरिक पर्यटनलाई प्रोत्साहन गर्न यो सेवा प्रभावकारी हुने अपेक्षा गरिएको छ। यसले पर्यटन व्यवसायीहरूलाई पनि डिजिटल माध्यममार्फत थप पहुँच दिनेछ।
