स्नेहा झा
होटल कोठामा लुकेका क्यामेरा पत्ता लगाउने सजिलो तरिका, तपाईंको स्मार्टफोनले नै गर्न सक्छ सहायता
यदि तपाईं घुमफिर गर्न मन पराउनुहुन्छ भने, कहिलेकाहीँ होटलमा कोठा पक्कै पनि बुक गर्नुभएको होला । अपरिचित सहरमा बस्नका लागि होटल रुम उपयुक्त विकल्प हुन्छ । तर, सुरक्षाको दृष्टिकोणले गोपनीयता र सुरक्षाको चिन्ता हुने गर्छ ।
होटलका कोठाहरूमा हिडन क्यामेरा भएका घटनाहरू बढ्दै गइरहेका छन्, जसले सचेत रहनुपर्ने आवश्यकता देखाएको छ । तर, धेरैलाई थाहा नहुन सक्छ कि तपाईंको स्मार्टफोनकै सहायताले पनि लुकेका क्यामेरा पत्ता लगाउन सकिन्छ । यहाँ, तपाईंले फोनको मद्दतले होटल कोठामा लुकेका क्यामेरा कसरी पहिचान गर्ने भन्ने जानकारी पाउनुहुनेछ ।
१. स्मार्टफोनको फ्ल्यासलाइट प्रयोग गरेर स्क्यान गर्नुहोस्
हिडन क्यामेरा पत्ता लगाउने सबैभन्दा सरल उपाय तपाईंको फोनको फ्ल्यासलाइट हो । कुनै पनि क्यामेराको लेंसमा उज्यालो पर्दा, त्यो चम्किन्छ, जसले क्यामेराको उपस्थिति पुष्टि गर्न सक्छ ।
यसका लागि कोठाको सबै बत्तीहरू निभाउनुहोस् । आफ्नो फोनको फ्ल्यासलाइट अन गर्नुहोस् ।
एयर भेन्ट्स (हावाको निकास स्थान), स्मोक डिटेक्टर, अलार्म घडी, ऐना जस्ता ठाउँहरूमा फ्ल्यासलाइटको उज्यालो पार्नुहोस् ।
यदि कुनै ठाउँमा सानो चमक देखिएमा, त्यस क्षेत्रको राम्रोसँग जाँच गर्नुहोस् ।
२. स्मार्टफोनको क्यामेरा प्रयोग गरेर इन्फ्रारेड (आईआर) लाइट पत्ता लगाउनुहोस्
धेरैजसो लुकेका क्यामेराहरू इन्फ्रारेड (इन्फ्रारेड –आईआर) लाइट उत्सर्जन गर्छन्, जुन नांगो आँखाले देख्न सकिँदैन, तर तपाईंको स्मार्टफोनको क्यामेरा मार्फत हेर्न सकिन्छ ।
के गर्ने?
कोठाको सबै बत्तीहरू निभाउनुहोस् वा कम उज्यालो बनाउनुहोस् । स्मार्टफोनको क्यामेरा एप खोल्नुहोस् ।
कोठाको चारैतिर विस्तारै स्क्यान गर्नुहोस् । यदि स्क्रिनमा चम्किरहेको बिन्दु वा हल्का उज्यालो देखिएमा, त्यस स्थानको जाँच गर्नुहोस् ।
३. क्यामेरा डिटेक्सन एप्सको प्रयोग गर्नुहोस्
कसैलाई शंका लागेमा, तपाईंले विशेष एपहरू प्रयोग गरेर लुकेका क्यामेराहरू पत्ता लगाउन सक्नुहुन्छ ।
यी एपहरू स्मार्टफोनका सेन्सरहरू प्रयोग गरेर इन्फ्रारेड लाइट, चुम्बकीय क्षेत्र वा अन्य संकेतहरू पहिचान गर्छन् ।
के गर्ने?
फोनमा क्यामेरा डिटेक्सन एप डाउनलोड गर्नुहोस् । वाई–फाई नेटवर्कमा जोडिएका अज्ञात उपकरणहरू खोज्नुहोस् ।
धेरै लुकेका क्यामेराहरू वाई–फाई नेटवर्कमा जोडिएर लाइभ फुटेज प्रसारण गर्ने गर्छन् । वाई–फाई सेटिङ खोल्नुहोस् र जडित उपकरणहरूको सूची हेर्नुहोस् ।
यदि कुनै अज्ञात डिभाइस (जस्तैः आईपी क्यामेरा वा क्यामेरा नामको कुनै उपकरण) देखिएमा, त्यसको बारेमा अनुसन्धान गर्नुहोस् ।
४. ब्लुटुथ स्क्यान गर्नुहोस्
धेरै लुकेका क्यामेराहरू वाई–फाई मात्र नभई ब्लुटुथ नेटवर्क मार्फत पनि सञ्चालनमा हुन्छन् । यसका लागि ब्लुटुथ सेटिङ खोल्नुहोस् । कुनै सन्देह लाग्ने उपकरण देखिएमा, त्यसको जाँच गर्नुहोस् ।
५. यदि लुकेको क्यामेरा फेला परेमा के गर्ने?
यदि कुनै सन्देहजनक उपकरण भेटियो भने, होटल व्यवस्थापन वा स्थानीय प्रहरीलाई तुरुन्त जानकारी दिनुहोस् ।
होटल व्यवस्थापनले सहयोग नगरेमा, कानुनी सहायता लिन सकिन्छ ।
