आईसीटी समाचार
सवारी साधन नपाएर एसईई दिएपछि घर फर्किन समस्या भएमा काठमाडौं महानगरपालिकाले घरसम्म पुर्याइदिने भएको छ ।
सूचना प्रकाशित गर्दै काठमाडौं महानगरपालिकाले सवारी साधन नपाएर एसइइ परीक्षा केन्द्रबाट घर फर्किन समस्या परेमा गन्तव्यमा पुर्याइदिने जानकारी दिएको हो ।
आज काठमाडौंको गणतन्त्रवादी र राजावादीले प्रदर्शनको तयारी गरेका छन् । त्यसले गर्दा सडकमा न्युन मात्र सवारीसाधन गुडेका छन् । यसैलाई ध्यानमा राख्दै काठमाडौं महानगरपालिकाले विद्यार्थीलाई गन्तव्यमा पुर्याइदिने भएको हो ।
परीक्षामा खटिने केन्द्राध्यक्ष र शिक्षकहरुलाई विद्यार्थीहरुलाई घर पठाउन सहजीकरण गरिदिनुहुन र आवश्यक परे आफैँ पनि सुविधा लिन महानगरले अनुरोध गरेको छ । यसका लागि महनागरले महानगर प्रहरी बलको सम्पर्क नम्बर समेत उपलब्ध गराएको छ ।
बानेश्वरतर्फका लागि नगर प्रहरी उपरीक्षक दिनेशकुमार अर्याल (९८५१०६८०९६), रत्नपार्कतर्फका लागि नगर प्रहरी उपरीक्षक मनोजप्रसाद लामिछाने (९८५१०९३१७६), नयाँ बसपार्कतर्फका लागि, नगर प्रहरी उपरीक्षक पूर्णचन्द्र भट्ट (९८५१२३३६३३) र टेकुतर्फका लागि, नगर प्रहरी निरीक्षक, प्रकाश पण्डित (९८५१०५६३४६) लाई सम्पर्क गर्न सकिने छ ।
यस बाहेक महानगर प्रहरी बलको हटलाइन नम्बर ०१५९०१७६४ र ९८५१३५६५०९ मा समेत सम्पर्क गर्न सकिने छ ।
