स्नेहा झा
अनलाइन भुक्तानीको सुरुवात पछि, एटिएमबाट पैसा निकाल्ने प्रक्रिया कम भएको छ तर पूर्ण रूपमा समाप्त भएको छैन् । एटिएमबाट पैसा निकाल्दा तपाईको सानो लापरवाहीले तपाईलाई ठूलो नोक्सानी पु¥याउन सक्छ । ठगी गर्नेहरूले तपाइँको एक गल्तीको फाइदा उठाउन र तपाइँको बैंकअकाउन्ट खाली गर्न सक्छन् । आजको रिपोर्टमा, हामी तपाईंलाई एटीएम ठगी र त्यसबाट बच्ने उपायहरूबारे बताउनेछौँ ।
कस्टमर सर्भिस कल गर्दा गल्ती
यस्ता धेरै घटना बाहिर आएका छन् जसमा एटीएम मेसिनमा मानिसको कार्ड अड्किएको गुनासो आउने गरेको छ । धेरै पटक मेसिनमा कार्ड अड्किन्छ र आत्तिएर हामी त्यहाँ लेखिएको ग्राहक सेवा नम्बरमा फोन गर्छौं, तर यहाँ तपाईंले धेरै सावधान रहनु आवश्यक छ ।
वास्तवमा यो मेसिनमा तपाईंको कार्ड अड्किएको होइन तर यी ठगहरूले कार्ड अड्काएका हुन् । तिनीहरूले कार्ड बोक्ने पोर्टमा अर्को मेसिन इन्स्टल गर्छन् र त्यसपछि ग्राहक सेवा नम्बरको रूपमा आफ्नो नम्बर टाँसेर छोड्छन् । कल गर्नु अघि, निश्चित रूपमा जाँच गर्नुहोस् कि नम्बर कुन तरिकामा लेखिएको छ । यदि कुनै सामान्य कागजमा नम्बर लेखेर टाँसिएको छ भने, त्यसमा कल नगर्नुहोस् ।
मेसिन जाँच गर्ने
एटिएमबाट पैसा निकाल्नु अघि र एटिएमभित्र जाने बित्तिकै, तपाईले गर्नु पर्ने काम भनेको राम्रोसँग जाँच गर्नु हो । वरिपरि हेर्नुहोस् र कुनै लुकेका क्यामेराहरू छन् कि भनेर पनि हेर्नुहोस् । तपाईंले एटीएम कार्ड स्लट पनि जाँच गर्नुपर्छ । धेरै पटक बदमाशहरूले कार्ड स्लटहरू वरिपरि कार्ड रिडर चिपहरू स्थापना गर्छन्, जसले एटीएम कार्ड डाटा र पिन कोड जानकारी चोर्न सक्छ । मेसिनमा केही नौलो त छैन् नी भनेर याद गर्नु आवश्यक हुन्छ ।
पिन इन्टर गर्दा सावधान हुनुपर्ने
यदि तपाईंको एटीएम पिन अपराधीहरूको लागि उपलब्ध छैन भने, तपाईंको खातामा छिर्न गाह्रो हुन्छ । यस्तो अवस्थामा एटीएम पिन धेरै सावधानीपूर्वक प्रयोग गर्नुपर्छ । ध्यान राख्नुहोस् कि तपाई एटीएम भित्र पैसा निकाल्न जानुभएको छ र त्यहाँ अरू कोही व्यक्ति हुनुहुँदैन् ।
यदि त्यहाँ अरू कोही उपस्थित छन् भने, उसलाई बाहिर जान वा पिन लुकाएर इन्टर गर्नुहोस् । पिन इन्टर गर्दा, आफ्नो हातले एटिएम किबोर्ड छोप्नुहोस् र सकेसम्म मेसिनको नजिक उभिनुहोस् । ताकि कसैले तपाईको पिन नदेखोस् ।
एटीएम पिन र कार्ड कसैलाई नदिनुहोस्
धेरै पटक हामीले आफ्नो एटीएम कार्ड र पिन हाम्रा साथी वा आफन्तहरूलाई हतारमा वा आपतकालीन अवस्थामा पैसा निकाल्न दिन्छौं । यस्तो गल्तीबाट बच्नुपर्छ । अचेल यस्ता घटना पनि बाहिर आउन थालेका छन् जसमा नजिकका मान्छेनै ठगीमा संलग्न हुन्छन् । यदि तपाईंले कसैलाई एटीएम कार्ड दिनु छ भने, तुरुन्तै कार्डको पिन परिवर्तन गर्नुहोस् र कारोबार केके भएका छन् भनेर याद राख्नुहोस् ।
एटिएममा कसैको सहयोग नलिनुहोस्
एटिएममा अपरिचित व्यक्तिको मद्दत लिनु हानिकारक हुन सक्छ । पैसा झिक्न अलि बढी समय लागे पनि एटीएम नजिक कसैलाई आउन नदिनुहोस् र आफ्नो कार्ड र पिन बिर्सिए पनि अरुलाई मद्दतका लागि नभन्नुहोस् ।
