आईसीटी समाचार
काठमाडौं महानगरपालिकाले कक्षा ११ मा पढ्ने विद्यार्थीलाई छात्रवृत्ति दिने भएको छ । त्यसका लागि महानगरले अनलाइन आवेदन माग गरेको हो ।
काठमाडौँ महानगरपालिका अन्तर्गतका संस्थागत शिक्षण संस्थामा कक्षा ११ मा भर्ना भई छात्रवृत्तिमा कोटामा अध्ययन गर्न चाहने विद्यार्थीहरूलाई परीक्षा प्रणालीबाट छात्रवृत्ति उपलब्ध गराइने छ ।
महानगरपालिकाको वेबसाइट वा entrance.kathmandu.gov.np मार्फत अनलाइन आवेदन दिन सकिने व्यवस्था मिलाइएको छ । अनलाइन आवेदन असार १५ गतेदेखि सुरू हुनेछ भने असार २९ गतेसम्म दिन सकिने छ ।
विज्ञान, व्यवस्थापन, मानविकी, शिक्षा र कानुनमा छात्रवृत्ति परीक्षा सञ्चालन हुनेछन् । छात्रवृत्तिको परीक्षा साउन ४ गते सञ्चालन हुनेछ ।
परीक्षामा सोधिने प्रश्नका विषय र क्षेत्र, माध्यमिक तह कक्षा १० को पाठ्यक्रममा आधारित १०० वटा बहुवैकल्पिक वस्तुगत हुनेछन् । कक्षा १० को पाठ्यक्रममा आधारित अनिवार्य गणित, विज्ञान, अंग्रेजी विषयबाट ३०/३० प्रश्र र सामान्य ज्ञानबाट १० प्रश्र सोधिनेछ ।
छात्रवृत्ति परीक्षा उत्तीर्ण हुन न्यूनतम ४० प्रतिशत अङ्क प्राप्त गरेको हुनुपर्नेछ । गलत उत्तरका लागि नेगेटिभ मार्किङ गरिने छैन ।
विद्यालयगत छात्रवृत्तिको कोटा र परीक्षा केन्द्र सम्बन्धी अन्य विवरण पछि प्रकाशन गरिने महानगरले जनाएको छ । साथै छात्रवृत्तिको नतिजा प्रकाशन भएपश्चात् मात्र विद्यार्थी भर्ना हुन विद्यार्थीहरूमा अनुरोध गरेको छ ।
नतिजा प्रकाशन हुनु अगाडि नै भर्ना भएका विद्यार्थीहरूलाई छात्रवृत्ति प्राप्तिका लागि सहजीकरण गर्न नसकिने समेत महानगरले जानकारी दिएको छ ।
आवेदन दिन आवश्यक न्यूनतम योग्यता
- एसईई मा न्यूनतम १.६ जीपीए ल्याई पूरा गरेको
- सामुदायिक विद्यालयबाट अध्ययन गरी एसईई पूरा गरेको
- काठमाडौं महानगरपालिकाको स्थायी बासिन्दाको हकमा जन्मदर्ता वा नागरिकता वा बसाईसराईको प्रमाणपत्र
- ल्याण्डफिल्ड साइडबाट प्रत्यक्ष प्रभावित क्षेत्र नुवाकोट जिल्ला ककनी गाउँपालिकाको वडा नं १,२,३ र धादिङ जिल्लाको धुनिवेशी नगरपालिका वडा नम्बर १,३,४ का स्थायी बासिन्दा (नागरिकता वा जन्मदर्ता) र सम्बन्धित वडाको सिफारिसपत्र
- संस्थागत विद्यालयमा कक्षा १० सम्म छात्रवृत्तिमा अध्ययन गरेको
अनलाइन फाराम भर्न चाहिने आवश्यक कागजात
- एसईई प्रवेश पत्र
- पासपोर्ट साईजको फोटो
- नागरिकताको प्रमाण पत्र वा जन्म दर्ताको प्रमाण पत्र
- SEE को चारित्रिक प्रमाण पत्र वा ट्रान्सफर प्रमाणपत्र वा विद्यालयको सिफारिसपत्र
- सामुदायिक विद्यालयमा अध्ययन गरेका विद्यार्थीका लागि अनुसूची १ बमोजिमको सिफारिसपत्र
- संस्थागत विद्यालयमा छात्रवृत्तिमा अध्ययन गरेका विद्यार्थीका लागि अनुसूची २ बमोजिमको सिफारिसपत्र
- तोकिएको आरक्षित समूहमा फाराम भर्नेको हकमा बुँदा नं. ७ (१) मा उल्लेख भएबमोजिमका प्रमाण पत्र
- काठमाडौं महानगरपालिकाको स्थायी बासिन्दा र ल्यान्डफिल्ड साइडका बासिन्दाको हकमा बुँदा नं ७ (२) मा उल्लेख भएबमोजिमका प्रमाण पत्र
