आईसीटी समाचार
वैदेशिक रोजगारीमा जानेले अब डिजिटल वालेट आईएमई पेबाटै डिजिटल कर्जा लिन सक्ने भएका छन् । ग्लोबल आईएमई बैंकसँगको सहकार्यमा आईएइमई पेले ‘डिजी लोन’ सेवा सुरू गरेको हो ।
विदेश जान तयार रहेकाहरूलाई लक्षित गर्दै डिजी लोन सेवालाई परीक्षणको रूपमा सुरू गरिएको आईएमई पेका सीईओ प्रविण रेग्मीले बताए । डिजी लोन बिना धितो लिन सकिने छ । यसका लागि वैदेशिक रोजगारीमा जान तयार रहेको भनेर श्रम स्वीकृत र बीमा गरेको कागजात पेश गर्नुपर्नेछ ।
यसबाट खाडी मुलक जानेलाई ५० हजार र अन्य देशमा जानेलाई १ लाख ५० हजारसम्म कर्जा उपलब्ध हुनेछ । यो कर्जा १२.८० प्रतिशतको स्थिर ब्याजदरमा पाइनेछ । कर्जाको अविधि १८ महिना तोकिएको छ । आईएमई पेबाट डिजी लोन लिन ग्लोबल आईएमई बैंकको खाता वालेटमा लिंक गर्नुपर्नेछ ।
नेपाल, भारत र भुटान बाहेक मलेशिया, साउदी अरब, कतार, ओमान, यूएई, जापान, दक्षिण कोरिया र अन्य प्रचलित गन्तव्यहरूमा वैदेशिक रोजगारीका लागि जानेहरुलाई प्राथमिकताका आधारमा कर्जा उपलब्ध हुनेछ ।
साथै वैदेशिक रोजगारबाट रेमिट्यान्स पठाउँदा ग्लोबल आईएमई बैंक अकाउन्टमा पैसा पठाएर सहजै कर्जा चुक्ता गर्न सकिने छ ।
