आईसीटी समाचार
एशियाली विकास बैंक (एडीबी) ले डिजिटल हेल्थ फाइनान्सिङ च्यालेन्ज आयोजना गर्ने भएको छ । विकासशील देशको राष्ट्रिय स्वास्थ्य वित्तीय प्रणालीलाई इन्नोभेटिभ डिजिटल प्रणालीबाट सुधार गर्ने उद्देश्यले बैंकले च्यालेञ्ज आयोजना गर्न लागेको हो ।
डिजिटल पेमेन्ट, इन्स्योरटेक, एक्सेस टु हेल्थ स्किम र फ्रड डिटेक्सन थिममा रहेर आवेदन दिन सकिने छ । यी थिममा आधारित रहेर काम गरिरहेका डिजिटल स्टार्टअप वा आईडियाले आवेदन दिन सक्ने छन् । आवेदन सोमबारसम्म मात्रै दिन सकिने छ । आवेदन दिन यहाँ क्लिक गर्नुहोस् । त्यसपछि शर्ट लिष्ट र पिचिङको प्रक्रिया सुरू हुनेछ ।
डिजिटल हेल्थ फाइनान्सिङ च्यालेन्ज छनौट भएका २ वटा स्टार्टअपले एशियाली विकास बैंक र विकासशील देशको सरकारसँग डिजाइन तथा कार्यान्वयनका लागि नजिक रहेका काम गर्न पाउने छन् ।
यस बाहेक उत्कृष्ट स्टार्टअपलाई २० हजार अमेरिकी डलर बराबरको ग्राण्ट र एडब्लुएसको क्रेडिट समेत प्रदान गरिने छ । सहभागीले मेन्टरसीप र नेटवर्किङको अवसर पाउने पनि जनाइएको छ ।
एशिया र प्यासिफिक क्षेत्रका केही देशले सार्वजनिक स्वास्थ्य प्रणालीमा गुणस्तरीय स्वास्थ्य सेवाको पहुँच र किफायतीता बढाउन विश्वव्यापी स्वास्थ्य कभरेजको वित्तपोषण गर्ने लक्ष्य हासिल गर्न चुनौतीहरूको सामना गरिरहेका छन् । त्यसैलाई कम गर्न एडीबीको यस च्यालेञ्जको सुरूवात गरेको हो ।
एशियाली विकास बैंकले डिजिटल हेल्थ फाइनान्सिङ च्यालेन्जका लागि डालबर्ग, आईक्युभीआईए र अमेजन वेब सर्भिसेससँग सहकार्य गरेको छ ।
