आईसीटी समाचार
नेपाल नेत्रहीन संघले विश्व सहायक प्रविधि दिवस मनाएको छ । उक्त अवसरमा संघले दृष्टिविहीनका लागि उपयोगी सहायक प्रविधि प्रर्दशनी र प्यानल संवाद सञ्चालन गरेको थियो ।
कार्यक्रम काठमाडौंको सुकेधारास्थित नेत्रहीन संघको कार्यालयमा भएको बिहान ११ बजेदेखि दिउँसो ३ बजेसम्म सञ्चालन भएको थियो ।
कार्यक्रममा मोबाइल तथा कम्प्युटर-आधारित प्रविधिहरू, ब्रेल उपकरण, स्क्रीन रिडर, एआई एप्स लगायतका विभिन्न सहायक प्रविधिहरूको प्रदर्शनी गरिएको थियो । उपस्थित अतिथिहरूले प्रविधिहरूको अनुभवसँगै प्रयोग पनि गर्न पाएका थिए ।
कार्यक्रममा ‘सहायक प्रविधिमा पहुँच सुनिश्चितता: समावेशीतामा सरोकारवालाहरूको भूमिका’ विषयक प्यानल छलफल थियो । प्यानललिष्टमा वक्ताको रूपमा महिला बालबालिका तथा जेष्ठ नागरिक मन्त्रालयकी निरा अधिकारी, उपाङ्गताको अधिकारी क्षेत्रमा काम गर्दै आएका डा. वीरेन्द्र राज पोखरेल, नास्टका प्रदीप ढोडारी र नेपाल टेलिकमका गौतम पोखरेल रहेका थिए ।
यसै अवसरमा संघले ‘टेकफरइन्क्लुजन नेपाल (Tech4Inclusion Nepal)’ नामक राष्ट्रिय सहायक प्रविधि अभियानको औपचारिक सुरूवात गरेको छ । यस अभियानमार्फत सहायक प्रविधि पहुँचको क्षेत्रमा काम गरिने छ ।
